Nuk ka paralajmërime se do të zgjidhet çështja e hapur me vendin e zbrazur në KSHZ. Përzgjidhja e anëtarit të KSHZ-së i detyroi deputetët e opozitës shqiptare që të bojkotojnë Kuvendin. Ata në koordinimin e parë pas festave të fund vitit te kryeparlamentari, Talat Xhaferi, nuk morën pjesë ndërsa paralajmëruan edhe masa tjera. Fadil Zendeli, nga Besa thotë se me këtë hidhen dyshime se pushteti dëshiron që të manipulojë zgjedhjet.
“Kjo është bllokadë e pastër që të mos zgjidhet dhe të kompletohet Komisioni shtetërorë zgjedhor, që të jetë legale dhe legjitime në zgjedhjet e ardhshme. Me vetë atë që Xhaferi me ekipin e tij në ndonjë mënyrë bllokon procese demokratike dhe dërgon porosi të keqe se planifikojnë të manipulojnë proceset zgjedhore.”- deklaroi Fadil Zendeli, Lëvizja Besa.
Tani për tani nuk ka paralajmërime nga Kuvendi se do të vazhdojë procesi për kompletimin e KSHZ-së. Zendeli megjithatë thotë se nuk do të heqin dorë nga insistimi që të zgjidhet anëtari nga radhët e tyre. Për këtë, siç shtoi, e kanë informuar edhe bashkësinë ndërkombëtare.
“Ne do të kryejmë presion aq sa mundemi edhe në Kuvend edhe jashtë tij. Për këtë është informuar edhe faktori ndërkombëtarë në vend. Siç filluan këta që ta bllokojnë këtë proces që vendi të mbetet i zbrazët në KSHZ, në një mënyrë ky është edhe qëllimi i tyre, por siç thashë, ne do të insistojmë me të gjithë mundësitë tona politike brenda Kuvendit por edhe jashtë Kuvendit që të kompletohet KSHZ-ja.”- pohoi Fadil Zendeli, Lëvizja Besa.
Edhe kryetari i VMRO-DPMNE-së, Hristijan Mickoski, vlerëson se me atë që nuk po zgjidhet anëtarë i KSHZ-së, hidhen dyshime për parregullsi në zgjedhje.
“Zgjedhjet që në fillim nuk janë të drejta, e shihni që nuk e plotësojnë vendin që i përket opozitës shqiptare në KSHZ. Vetë procesi që në fillim ka shumë mangësi.”- tha Hristijan Mickoski, kryetar i VMRO-DPMNE-së.
Politizimi i gjithë procesit krijon problem për kompletimin e KSHZ-së, andaj, siç vlerëson Maksim Dimitrievski, kryetarë i Kumanovës dhe partisë ZNAM në emisionin e TV21, Klik Plus, ky trup duhet të jetë i pavarur.
“Atë trup politik që e përbëjnë përfaqësuesit që duhet të delegonë partitë politike dhe vlerësoj se tendenca jonë si shtet duhet të jetë që të krijojë një KSHZ të pavarur, që do t’i shërbejë qytetarëve dhe do të jetë në funksion të zhvillimit të demokracisë dhe në mënyrë shtesë të sigurojë siguri për votuesit.”- deklaroi Maksim Dimitrievski, kryetar i ZNAM.
KSHZ ka 7 anëtarë, por pasi që u largua Krenar Lloga, dhe u bë ministër i drejtësisë, një vend mbeti i zbrazët. Për atë vend opozita shqiptare e propozoi Abdush Demirin, por pasi që u bllokua përzgjedhja, ata thane se do ta bojkotojnë Kuvendin.
