Departamenti për Kontroll të Brendshëm, Hetime Penale dhe Standarde Profesionale në Ministrinë e Punëve të Brendshme ka bërë kallëzim penal kundër LJ.Z. punonjës në Sektorin për armë, eksploziv dhe lëndë të rrezikshme – Ohër, Departamenti për armë, eksploziv dhe lëndë të rrezikshme në Departamentin për Çështje civile, për shkak të ekzistimit të shkaqeve të dyshimit se ka kryer veprën penale “keqpërdorim i pozitës zyrtare” sipas nenit 353 të Kodit Penal, në lidhje me nenin 9 paragrafi 5 të Ligjit për Armët dhe nenin 6 dhe nenin 7 të Ligjit për Taksat Administrative në MPB.
Ai ka marrë para në dorë nga qytetarët që kanë patur nevojë për shërbime administrative duke iu thënë se ai do të bëjë pagesën në vend të tyre, por ato para nuk i ka futur kurrë në llogarinë e MPB-së.
“I denoncuari Lj.Z., në cilësinë e personit përgjegjës, në periudhën nga data 01.01.2022 deri më 05.08.2024, i ka marrë personalisht paratë që duhet të paguajnë në xhiro llogarinë e MPB-së për tarifa administrative nga kërkuesit, për të kryer një shërbim për ta, pra për të bërë një pagesë për tarifat administrative në emër të tyre. Por në vend të kësaj ai në mënyrë të kundërligjshme i ka përvetësuar paratë dhe me këtë ka përfituar para për vete dhe i ka shkaktuar dëm buxhetit të MPB-së në shumë prej 60.950 denarë”
Në periudhën e përcaktuar, për gjithsej 179 kërkesa të pranuara, nuk ka konfirmim për tarifat administrative të paguara. Për shkak të shkeljes më të rëndë të rendit dhe disiplinës së punës, Departamenti i Kontrollit të Brendshëm ndaj LJ.Z. do të paraqesë edhe propozim për fillimin e procedurës për përcaktimin e përgjegjësisë disiplinore dhe do të nxjerrë masa obligative për largim nga vendi i punës deri në marrjen e vendimit në procedurë disiplinore, njofton MPB.
