Kryetari i Komunës së Çairit, Izet Mexhiti, ka vlerësuar hapjen e Festivalit Ndërkombëtar të Muzikës “Çarshia”, duke theksuar se interesimi i madh i publikut dëshmoi rëndësinë e investimit në kulturë dhe krijimin e traditave të reja artistike në Shkup.
“Dritat u ndezën. Suli Hani mori frymë ndryshe. Tingujt e parë u përzien me muret shekullore, ndërsa një publik i jashtëzakonshëm mbushi çdo hapësirë, duke i dhënë Festivalit Ndërkombëtar të Muzikës ‘Çarshia’ një fillim që do të mbahet mend.
Mbrëmja e parë solli një program artistik të ndërtuar me kujdes, interpretime të një niveli të lartë dhe një atmosferë që i dha dinjitet një festivali me ambicie ndërkombëtare. Artistët dhe publiku krijuan së bashku një përjetim që e ktheu këtë hapësirë historike në një skenë të vërtetë të artit.
Interesimi i jashtëzakonshëm i publikut është konfirmimi më i mirë se investimi në kulturë është investim në identitet, në edukim estetik dhe në jetën publike të qytetit. Ngjarje të tilla nuk pasurojnë vetëm kalendarin kulturor; ato ndërtojnë tradita, krijojnë standarde të reja artistike dhe e pozicionojnë Shkupin gjithnjë e më fuqishëm në hartën kulturore të rajonit.
Falënderoj nga zemra të gjithë artistët, ekipin organizativ, partnerët dhe secilin që kontribuoi në realizimin e kësaj mbrëmjeje të veçantë. Ky është vetëm fillimi.
Festivali ‘Çarshia’ vazhdon edhe në netët në vijim, me bindjen se kemi nisur një traditë që do të rritet nga viti në vit dhe do të bëhet një nga ngjarjet më të rëndësishme kulturore të qytetit”, ka shkruar Mexhiti.
