Kryetari i Alternativës, Zeqirija Ibrahimi, ka theksuar se ideja e ngritjes së koalicionit VLEN ka qenë dhe mbetet rrënimi i një sistemi të kalbur dhe krijimi i një qeverisjeje pa korrupsion, me një vizion të ri përfaqësimi.
Në një status të publikuar në rrjetet sociale, Ibrahimi ka theksuar se VLEN nuk është një mjet për llogaritjen e pushtetit, por një koalicion që ka përmbysur një regjim 22-vjeçar, i cili, sipas tij, ka qenë përfaqësimi më i dobët i shqiptarëve.
“VLEN-i nuk është dhe nuk duhet të jetë një kalkulator që e llogarit mënyrën e përfitimit të pushtetit. Ky koalicion është përmbysje e një regjimi që për 22 vjet ishte përfaqësimi më i dobët për shqiptarët, që në fund u metaforizua me qendra tregtare si Soravia dhe me listën e zezë amerikane të personave non-grata,” shkruan ai.
Ibrahimi ka shtuar se për VLEN-in nuk janë të rëndësishme debatet për numra, përqindje apo ndarje të pushtetit, por ndryshimi i vërtetë politik.
“Pyetja e vetme që ka rëndësi – atëherë dhe sot – është: a jemi ne ata që do ta rrënojmë regjimin dhe do të bëjmë ndryshimin? Në zgjedhjet e kaluara qytetarët shqiptarë na besuan për këtë dhe na mandatuan. Edhe zgjedhjet e ardhshme e kërkojnë përgjigjen e njëjtë,” ka përfunduar ai.
Sipas Ibrahimit, VLEN mbetet ideja që sjell ndryshimin.
