Ajo është një ndër femrat më të shkolluara shqiptare në Zvicër, por mbetet një figurë e thjeshtë, e përkushtuar dhe larg vëmendjes mediatike. Profesoresha Arlinda Amiti, aktualisht ligjëruese në Universitetin e Bazelit, po shkruan një kapitull të ri në historinë e diasporës shqiptare.
E diplomuar dhe e formuar akademikisht në Zvicër, Amiti është koordinatore e programit të doktoraturës “Islami dhe Shoqëria: Studime Teologjike Islame” në Qendrën Zvicerane për Islamin dhe Shoqërinë (SZIG), një nga institucionet më prestigjioze për studime islame në Evropë.
Përtej titujve akademikë dhe pozicionit të lartë, ajo njihet për modestinë e saj të rrallë – i shmanget publicitetit, nuk i pëlqen të flasë për veten dhe nuk kërkon lavdi. Për të, suksesi është punë e përditshme, jo vetëlavdërim.
“Arlinda Amiti është më shumë se shembull i integrimit – ajo është një gur themeli në ndërtimin e urave mes kulturave, besimeve dhe komuniteteve në Zvicër,” shkruan gazeta zvicerane Le Canton27.ch.
