Proceset aktuale reformuese në drejtësi dhe progresi i vendit në procesin e eurointegrues ishin në fokus të takimit ndërmjet ministrit të Drejtësisë, Jeton Shasivari, dhe zëvendësministrit të Drejtësisë, Alen Dereban, me ambasadorin dhe shefin e Delegacionit të Bashkimit Evropian në vend, Michalis Rokas.
Siç njoftojnë nga Ministria e Drejtësisë, ministri Shasivari ka theksuar përkushtimin e ministrisë për zbatimin e reformave në përputhje me rekomandimet e Komisionit Evropian, me theks të veçantë në sundimin e ligjit dhe përmbushjen e detyrimeve nga Agenda e Reformave dhe Klasteri “Vlerat Fundamentale”.
“Në takim u diskutua edhe për zbatimin e Strategjisë Sektoriale të Zhvillimit për Drejtësinë 2024–2028, si dhe për aktivitetet që po realizohen me mbështetjen e Bashkimit Evropian përmes projekteve IPA për forcimin e sistemit gjyqësor dhe digjitalizimin e tij”, bëjnë të ditur nga ministria.
Ata shtohen se është shprehur falënderim për mbështetjen e vazhdueshme nga Bashkimi Evropian në zbatimin e reformave, e cila ka një rol të rëndësishëm në forcimin e institucioneve, avancimin e sundimit të ligjit dhe përshpejtimin e integrimit evropian të vendit.
“Në këtë drejtim, u theksua edhe nevoja për ndihmë ekspertësh nga Bashkimi Evropian në reformat e legjislacionit penal”, thonë nga Ministria e Drejtësisë.
Në takim, siç plotësojnë nga ministria, u konfirmua angazhimi i përbashkët për vazhdimin e bashkëpunimit partnerial dhe intensifikimin e proceseve reformuese në drejtësi, me qëllim avancimin e pavarësisë së saj funksionale në përputhje me standardet evropiane dhe prioritetet reformuese të vendit.
