Një dron i vogël ka hyrë dy herë gjatë natës mes 10 dhe 11 shtatorit në një apartament në një ndërtesë në rrugën „Dimitar Vllahov“, në qendër të Koçanit. Banorët kanë raportuar se janë filmuar teksa flinin.
Sipas dëshmive të banorëve, droni hyri në dhomën e gjumit përmes derës së hapur të ballkonit. Zhurma e helikave i zgjoi, ndërsa gjatë përpjekjes për t’u larguar, droni u përplas me xhamin e derës. Në rastin e dytë, ai hyri rreth një metër në dhomë dhe më pas arriti të largohej përmes ballkonit.
Ministria e Punëve të Brendshme konfirmoi se ka marrë një denoncim për rastin. Policia ka njoftuar prokurorin publik dhe ka kërkuar verifikim nga Agjencia e Aviacionit Civil nëse në atë periudhë ishte regjistruar përdorimi i ndonjë droni në territorin e Komunës së Koçanit.
Prokuroria Publike në Koçan ka bërë të ditur se po ndërmerren veprime për zbulimin e autorit.
Banorët dyshojnë se rasti mund të lidhet me veprat penale të cenimit të paprekshmërisë së banesës dhe filmimit të paautorizuar, por kualifikimin juridik do ta përcaktojnë institucionet kompetente pas përfundimit të hetimeve.
