Qeveria ‘Kurti’ ka marr vendim të premten që të zgjerojë grup-moshat që përfitojnë nga platofrma Superpuna, nga 18-25 vjeç në 18-29 vjeç.
Kryeministri Albin Kurti ka folur pas zgjerimit të platformës së punësimit për të rinjtë.
Ai deklaroi se “që prej lansimit të platformës në shkurt të vitit të kaluar kanë përfituar gjithsej 9,394 të rinj përmes subvencionimit të pagës me vlerë prej 264 euro për gjashtë muaj me radhë. E prej atyre që kanë përfunduar gjashtëmujorit të paraparë të mbështetur nga Qeveria, 67% kanë vazhduar punësimin e rregullt”.
Por dikush ka një mendim krejt tjetër.
“Kjo është në kuadër të “vitrave”, po jo punësimit të qëndrueshëm”.
Kështu e ka vlerësuar platformën Superpuna, anëtarja e Komisionit për Ekonomi, Valentina Bunjaku-Rexhepi.
Ajo për Front Online tha se platforma në fjalë nuk është zgjidhje për punësim por për vota.
Zgjerimi i platformës për punësimin e të rinjve vjen në një vit zgjedhor për fitimin e votave, thotë deputetja e LDK-së.
“Kjo është në kuadër të “vitrave”, po jo punësimit të qëndrueshëm, afatgjatë dhe me shpresë për rritjen e punësimit. Superpuna nuk është zgjidhje, por qasje elektorale, duke e personalizuar lidhjen në mes qytetarit dhe Qeverisë Kurti 2, për vota. Jemi në vit zgjedhor dhe tash e zgjerojnë edhe grupmoshën, pasi duan më shumë vota”, deklaroi Bunjaku-Rexhepi për Front Online.
Ministri i Financave, Punës dhe Transfereve, Hekuran Murati tha se gati një vit më herët kur e lansuam platformën, synimi ka qenë që përmes saj të mbështetet punësimi i 10 mijë të rinjve të grupmoshave 18-25.
Ai theksoi se një vit pas, kur të përfshihen shifrat edhe të muajit janar, pritet të arrihet shifra prej 10 mijë aq edhe sa ka qenë synimi, që dëshmon se platforma ka qenë e suksesshme por edhe parashikimi ka qenë i saktë.
Në shkurt të vitit 2023 u lansua për herë të parë platforma e punësimit për të rinjtë SuperPuna.
Qëllimi i saj është ndërmjetësimi i të rinjve punëkërkues 18-29 vjeç me punëdhënës potencial. Punëdhënësit mund të jenë nga sektori privat, publik dhe sektori jo-qeveritar.
