Komisioni kuvendor për sistem politik dhe marrëdhënie ndërmjet bashkësive sot duhet të debatojë për amendamentet e dorëzuara për Propozim-ligjin për të punësuarit në sektorin publik, Propozim-ligjin për nëpunësit administrativ dhe Propozim-ligjin për zhvillim profesional dhe trajnim të nëpunësve administrativ, të gjitha në lexim të dytë.
Pakoja e ligjeve reformuese për administratën, javën e kaluar u miratua në lexim të parë në seancë plenare, sipas Strategjisë për reforma të administratës publike, Planit aksionar të Ministrisë së Administratës Publike dhe Librit të afateve për agjendën evropiane.
Shërbimi për shtyp i Kuvendit njoftoi se Komisioni për sistem politik do të mbajë edhe një seancë, në të cilën në rend dite janë Propozim-ligji për ndryshimin e Ligjit për çmimet shtetërore dhe Propozim-ligji për plotësimin e Kodit Penal, të dyja në lexim të parë.
