Amir Elezi, Drejtor i Institutit për Mjekësi të Transfuzionit në një deklaratë për Ritmin e Ditës në RTVM 2, ka folur rreth sfidave dhe misionit të këtij Instituti.
“Misioni parësor i Institutit për Mjekësi të Transfuzionit të Gjakut në Shkup është që të siguroj gjak dhe produkte të gjakut të sigurta dhe të kontrolluara për të gjithë pacientët të cilët kanë nevojë të trajtohen dhe të marrin trajtimin nga Klinikat në nivel të Republikës së Maqedonisë së Veriut”, deklaroi Elezi.
Elezi theksoi se gjatë vitit 2024 ishte numër rekord i dhuruesve të gjakut.
“Viti 2024 ishte viti ku u arrit numri rekord i dhuruesve vullnetar të gjakut. Faktikisht ne kishim 58.000 dhurues për vitin 2024 që është një numër solid i cili i përmbush të gjitha nevojat e pacientëve dhe të Klinikave të cilat kanë nevojë për gjak dhe për produkte të gjakut. Mirëpo, siç evoluon mjekësia, po ashtu edhe kemi numër të madh të shtruarve sidomos atyre që janë me sëmundje onkologjike, d.m.th. me kancer dhe me sëmundje hematologjike. Dhe nevojat rriten dita-ditës. Prandaj, edhe angazhimi jonë është që të sigurojmë sasi të mjaftueshme nëpërmjet fushatave dhe dhuruesve vullnetar të cilët vijnë në ambientet e Institutit tonë dhe në qendrat tona për të dhuruar gjak”, deklaroi Elezi.
Grup moshat që dhurojnë më së shumti gjak, sipas Amir Elezit, janë pjesa më vitale e shoqërisë, ato nga mosha 19 deri në moshën 30 vjeç.
“Grup moshat të cilat janë dhurues më të shpeshtë, janë normal grup moshat më vitale, të rinjtë, faktikisht nga mosha 19 deri në mosha 30 vjeç e kemi përqindjen më të madhe të dhuruesve të gjakut dhe ky është një fakt që na gëzon, shkaku se janë grupe mosha të cilat nuk kanë sëmundje shoqëruese, njashtu janë pjesa më vitale e shoqërisë e cila dhuron gjak vullnetar”, deklaroi Elezi.
