Ambasadorë të shumtë, përfshirë ata nga pesë vendet e QUINT-it, i kanë shkuar të hënën në zyrë kryeministrit Albin Kurti për t’ia kërkuar shtyrjen e zbatimit të Rregullores së re të BQK-së, e cila ndalon përdorimin e valutave tjera përveç Euros. Ambasadori i SHBA-së, Jeffrey Hovenier tha se ia njohin të drejtën Kosovës për zbatimin e Kushtetutës në të gjithë vendin, por ka shprehur shqetësim për mënyrën se si qeveria ka zgjedhur ta zbatojë rregulloren
Ambasadorët e vendeve të QUINT-it dhe shteteve të tjera në Kosovë i kanë kërkuar edhe një herë kryeministrit Albin Kurti që ta shtyjë zbatimin e Rregullores së Bankës Qendrore, e cila nga 1 shkurti ndalon përdorimin e dinarit të Serbisë në Kosovë.
Kërkesën e ka përsëritur ambasadori i ShBA-së në Kosovë, Jeffrey Hovenier,
i cili dha një deklaratë për media pas takimit të së hënës. Ai tha se e njohin të drejtën e Kosovës për zbatimin e Kushtetutës, por vendimet si ky, duhet të paraprihen me fushatë informuese për qytetarët.
“Do të thosha se të gjithë ne nga trupi diplomatik, që folëm për këtë çështje, shprehëm shqetësime shumë të ngjashme për mënyrën e zbatimit të saj. Unë vetëm mund të ritheksoj atë që Shtetet e Bashkuara shpresojnë të shohin një shtyrje në zbatimin e kësaj rregulloreje derisa të jetë bërë më shumë punë për të zhvilluar një plan dhe një strategji që adreson shqetësimet e komunitetit serb. Ne gjithashtu besojmë fuqishëm se nuk ka informacion të mjaftueshëm publik për ta shpjeguar këtë. Sigurisht që ne mbështesim përpjekjet për të shmangur krimet financiare, pastrimin e parave, financimin e terrorizmit, dhe gjëra të tilla. Por kemi shqetësime të thella për mënyrën e zbatimit të kësaj rregulloreje që nuk besojmë se merr parasysh disa realitete dhe shqetësime nga komuniteti”, theksoi ai.
Lidhur me rregulloren e BQK-së që nxiti reagimin e Serbisë, presidentja Vjosa Osmani tha pas takimit me ministrin e Mbrojtjes të Gjermanisë, Boris Pistorius, se me rëndësi është koordinimi me aleatët perëndimorë.
“Aleatët tanë nuk kanë qenë asnjëherë kundër Kushtetutës së Kosovës, aleatët tanë asnjëherë nuk kanë qenë pro dinarit serb, aleatët tanë asnjëherë nuk kanë qenë kundër sundimit të ligjit. Përkundrazi, këtë Kushtetutë dhe çdo sukses që kemi arritur, e kemi arritur bashkë me aleatët tanë tradicionalë, përfshirë SHBA-në, Gjermaninë dhe shtetet tjera. Rrjedhimisht, unë nuk shoh asgjë abnormale në bashkëpunimin ndërmjet institucioneve të Kosovës dhe aleatëve tanë ndërkombëtarë në gjetjen e rrugëve shumë efektive nëpërmjet të cilave do të informoheshin qytetarët e Kosovës se si do të zbatohet rregullorja e BQK-së, e cila nuk është rregullore kundër dinarin nuk e përmend dinarin, por ka të bëjë me spastrimin e parave, parandalimin e korrupsionit dhe masat tjera”, deklaroi Osmani.
E ministri gjerman theksoi se duhet t’i jepet më shumë kohë informimit të qytetarëve rreth rregullores.
“Ne jemi të vetëdijshëm se Kosova ka të drejtë për të zbatuar ligjshmërinë e saj. Në kuadër të shtensionimit bëjnë pjesë edhe masat legjitime sa i përket vendosjes së euros si valutë e vetme. Por kjo duhet të komunikohet në mënyrë më të përshtatshme që mos të ketë mungesë informacionesh. Nëse kemi një afat prej vetëm një muaji dhe përmes tij i shkaktojmë vështirësi komunitetit pakicë, atëherë kjo mund të kontribuoj më pak në stabilitetin në vend. Mendoj se është më mirë të zbatohet rregullorja por të jepet një afat më i gjatë për zbatimin e saj”, theksoi Pistorius.
E kryeministri Kurti nuk ka dhënë sinjale se do të kërkojë shtyrjen e zbatimit të rregullores. Sipas komunikatës, Kurti citohet t’u ketë thënë ambasadorëve se situata në terren e as përmbajtja e rregullores nuk janë ashtu siç po portretizohen nga Serbia. Shefi i qeverisë ka shprehur gatishmërinë për adresimin e shqetësimeve duke përmendur informimin e bizneseve, të cilat operojnë me dinar.
Rreth 40 mijë qytetarë serbё në Kosovë kanë llogari bankare në njërën nga bankat e licencuara në Kosovë. Përmes tyre ata pranojnë pensione, mbështetje sociale, paga mujore, shtesa për fëmijë e lehona, e shtesa tё tjera të njëhershme nga thesari i shtetit të Kosovës”, thuhet në njoftim. Më tej njoftohet se Kurti ka shprehur gatishmërinë e Qeverisë së Kosovës dhe institucioneve vartëse që të adresojnë çdo shqetësim të ngritur, teksa ka theksuar se fokusi do të jetë informimi i bizneseve të cilat operojnë në dinar dhe në mënyrë të paformalizuar.
Të hënën për rregulloren ka komentuar edhe emisari i BE-së për dialogun, Kosovë-Serbi, Miroslav Lajçak, tek ka bërë një përmbledhje javore pas vizitave në Prishtinë e Beograd. Ai e ka quajtur javë të ngarkuar, duke përmendur zhvillimet rreth Rregullores së Bankës Qendrore, që sipas tij, ndikon te komuniteti serb në Kosovë.
