Partia Alternativa ka njoftuar se në mbledhjen e sotme të Kryesisë Qendrore ka vendosur për emrin e ministrit dhe zv/ministrat që do ta përfaqësojnë këtë parti në Qeverinë e ardhshme.
Ministër i Eurointegrimeve unanimisht është votuar të jetë Orhan Murtezani, i cili më parë ka ushtruar detyrën e drejtorit të MEPSO-s dhe të Hekurudhave të Maqedonisë.
“Në këtë mbledhje është diskutuar edhe kandidati për zëvendësministër të Ministrisë së Arsimit dhe Shkencës dhe po ashtu me vota unanime për këtë detyrë është propozuar Prof. dr. Lulzim Aliu, profesor universitar e prodekan në Fakultetin Pedagogjik, ish zëvendësministër i Arsimit dhe aktualisht Sekretar i Sekretariatit të Politikave Strategjike në Alternativë.
Meqë Alternativa e ka marrë edhe përgjegjësinë e zëvendësministrit të Ministrisë së Bashkësive Etnike, Kryesia Qendrore diskutoi edhe për këtë emër dhe në mënyrë unanime vendosi që kandidati i Alternativës për këtë detyrë të jetë Safije Sadiki Shaini – profesoreshë universitare, ish deputete dhe aktualisht nënkryetare e Alternativës”, thuhet në njoftimin e Alternativës.
Po ashtu në këtë mbledhje, thonë nga Alternativa, është dikutuar edhe tema e dorëheqjes tashmë të ish kryetarit të partisë Afrim Gashi, i cili është zgjedhur në detyrën e kryetarit të Kuvendit.
“Duke gjykuar se në të mirë të përfaqësimit të partisë është që partia të ketë kryetar të plotfuqishëm, Kryesia Qendrore e Alternativës ka vendosur që ta ftojë Kuvendin Qendror, të cilit do t’i propozojë që të marrë vendim për organizimin të kongresit të jashtëzakonshëm për zgjedhje të kryetarit të Alternativës”, thuhet në komunikatën e Alternativës.
