Përplasjet brenda Aleancës Kombëtare për Integrim (AKI) po thellohen. Pas kritikave të aktivistëve të Aleancës për Shqiptarët (ASH) ndaj mënyrës së funksionimit të frontit opozitar dhe kërkesave për rishikimin e pozicionit të partisë brenda tij, në skenë dalin edhe pakënaqësitë brenda BDI-së.
Në një reagim të publikuar në rrjetet sociale, Aleanca Kombëtare për Integrim ka kërkuar dorëheqjen e Faton Ahmetit, Bujar Osmanit dhe Arbër Ademit, duke i bërë përgjegjës për humbjet dhe dështimet politike.
“Secili fajtor për humbjet dhe dështimet duhet të mbajë PËRGJEGJËSI!”, thuhet në reagimin e publikuar në faqen e AKI-së.
Kjo kërkesë vjen një ditë pas reagimit të Liridon Ramadanit, aktivist i afërt me Arben Taravarin, i cili kërkoi që ASH-ja të rishikojë pozicionin e saj brenda AKI-së, duke kundërshtuar barazimin e rolit të saj me atë të subjekteve të tjera.
Ramadani kishte theksuar se ASH-ja nuk është zgjatim i BDI-së dhe se partneriteti brenda frontit opozitar duhet të bazohet në barazi, duke e përmbyllur reagimin me mesazhin: “Partneritet po, nënshtrim jo!”.
Dy reagimet e njëpasnjëshme nxjerrin në pah pakënaqësitë dhe tensionet që po shfaqen brenda opozitës shqiptare, si në raportet mes BDI-së dhe ASH-së, ashtu edhe në përplasjet për përgjegjësinë për humbjet politike.
