–Nevojitet mbrojtje dhe forcim më i madh i familjes dhe vlerave familjare, duke pasur parasysh se bëhet fjalë për fusha me rëndësi të madhe për të dyja shoqëritë. Gjithashtu, nevojitet bashkëpunim më i madh në të gjitha nivelet, pasi ruajtja e komunikimit intensiv në nivel të lartë kontribuon ndjeshëm në avancimin e marrëdhënieve të përgjithshme, konstatuan kryetari i Kuvendit, Afrim Gashi, dhe ministrja e Familjes dhe Shërbimeve Sociale e Republikës së Turqisë, Mahinur Özdemir Göktaş, në takimin e sotëm në Shkup.
Kryetari Gashi, siç informojnë nga shërbimi për shtyp i Kuvendit, shprehu kënaqësi të madhe për mundësinë që të takohet me ministren Göktaş dhe të diskutojnë për vlerat familjare si një përcaktim civilizues. Ai theksoi se politika sociale dhe çështjet që lidhen me mbrojtjen dhe forcimin e familjes përfshijnë një gamë të gjerë politikash dhe shërbimesh të orientuara drejt familjeve, grave, fëmijëve, personave me aftësi të kufizuara, të moshuarve dhe kategorive të tjera të cenueshme. Vendi ynë është i gatshëm për shkëmbimin e përvojave dhe praktikave të mira me Turqinë në këto fusha, veçanërisht në drejtim të zhvillimit të shërbimeve sociale të qasshme dhe cilësore në komunitet.
Ai shprehu bindjen se diplomacia parlamentare mund të luajë një rol të rëndësishëm në forcimin e mëtejshëm të marrëdhënieve dypalëshe dhe të krijojë hapësirë për forma të reja të bashkëpunimit institucional ndërmjet dy vendeve.
Ministrja Göktaş theksoi se Republika e Maqedonisë së Veriut dhe Republika e Turqisë kultivojnë një miqësi dhe partneritet të fortë tradicional, si dhe kanë lidhje të thella historike dhe kulturore. Ajo theksoi se Turqia i ka shpallur dhjetë vitet e ardhshme si Dekada e Familjes dhe Popullsisë, me fokus në forcimin dhe mbrojtjen e familjes dhe fëmijëve, nxitjen e martesës, veçanërisht te të rinjtë, si dhe rritjen e natalitetit dhe mbështetjen e prindërve.
