Ethel Caterham, personi më i vjetër në botë, festoi ditëlindjen e saj të 117-të e rrethuar nga familja dhe miqtë në Shtëpinë e Pleqve Hallmark Lakeview në Lightwater, Surrey.
Caterham e përshkroi vitin e kaluar si një periudhë në të cilën përjetoi “shumë përvoja të reja për herë të parë”. Midis tyre, ajo veçoi takimin me Mbretin Charles III, të cilin madje e mbajti për dore.
“Faleminderit për të gjitha kartolinat e mrekullueshme të ditëlindjes. Edhe në moshën 117 vjeç, kam pasur shumë përvoja të reja këtë vit, nga përkëdhelja e një lame deri te mbajtja e dorës së mbretit”, tha Caterham.
“Pata një ditë të mrekullueshme duke festuar me familjen dhe miqtë dhe mezi pres atë që do të sjellë viti i ardhshëm”, shtoi ajo.
Ethel Caterham lindi më 21 gusht 1909 në Shipton Bellinger, Hampshire, Angli. Ajo lindi pesë vjet para fillimit të Luftës së Parë Botërore dhe sot është personi i fundit i njohur që ka lindur gjatë mbretërimit të Mbretit Edward VII.
Caterham u bë personi më i vjetër në botë më 30 prill 2025, pas vdekjes së murgeshës braziliane Inah Canabarro Lucas në moshën 116 vjeç. Statusi i saj është konfirmuar nga Rekordet Botërore Guinness dhe organizatat që merren me verifikimin e jetëgjatësisë.
Takimi me Mbretin Charles
Një nga momentet kulmore të vitit të saj të 117-të ishte takimi me Mbretin Charles III në shtator 2025. Mbreti e vizitoi atë në azilin e të moshuarve dhe gjatë takimit i mbajti dorën. Me atë rast, Caterham kujtoi kohën kur Charles u bë Princ i Uellsit në vitin 1969.
Pastaj, me një buzëqeshje, ajo i tha: “Të gjitha vajzat atëherë ishin të dashuruara me ty dhe donin të martoheshin me ty.”
Charles është monarku i gjashtë britanik, mbretërimi i të cilit ka përjetuar Caterham.
Një jetë më shumë se një shekull
Në moshën 18 vjeç, në vitin 1927, Caterham udhëtoi në atë që atëherë ishte India Britanike, ku punoi si dado për një familje ushtarake. Ajo kaloi tre vjet në Indi para se të kthehej në Mbretërinë e Bashkuar.
Në vitin 1931, ajo takoi bashkëshortin e saj të ardhshëm, Norman Caterham, një anëtar i ushtrisë britanike. Ata u martuan në vitin 1933 dhe, për shkak të shërbimit të tij ushtarak, jetuan në Gjibraltar dhe Hong Kong. Ndërsa ishte në Hong Kong, Caterham krijoi një kopsht për fëmijë vendas dhe britanikë.
Gjatë jetës së saj, ajo jetoi dy luftëra botërore, mirëpriti gjashtë monarkë britanikë dhe dëshmoi disa nga ngjarjet më të mëdha të shekujve 20 dhe 21.
Ajo e drejtoi makinën deri në moshën 97 vjeç dhe në moshën 110 vjeç e kaloi COVID-19.
Edhe pse Ethel Caterham është personi më i vjetër në botë, rekordin për jetën më të gjatë të konfirmuar njerëzore e mban ende francezja Jeanne Calment, e cila jetoi 122 vjet e 164 ditë. /tesheshi.com/
