LSDM ka reaguar ndaj deklaratave të kryeministrit Hristijan Mickoski për sukseset ekonomike të vendit, duke vlerësuar se të dhënat e Drejtorisë së të Ardhurave Publike (PRO) tregojnë një realitet krejtësisht tjetër.
“Çfarë lloj ‘ekonomie të tretë në Evropë’ ka Mickoski kur mbi 73 për qind e qytetarëve marrin paga nën mesataren? Të dhënat e PRO-së e demaskojnë propagandën qeveritare. Nuk ka ekonomi të tretë në Evropë, por 73 për qind të qytetarëve me paga nën mesataren dhe një qeveri që po i dëmton qytetarët”, thuhet në reagimin e LSDM-së.
Sipas partisë, rreth 50 për qind e të punësuarve marrin paga mujore nga 24.000 deri në 36.000 denarë, ndërsa standardi i jetesës është përkeqësuar ndjeshëm gjatë dy viteve të qeverisjes së Mickoskit dhe VMRO-DPMNE-së.
LSDM thekson se shporta minimale sindikale ka arritur në rreth 70.000 denarë, duke argumentuar se një pjesë e madhe e familjeve nuk arrijnë të mbulojnë as shpenzimet bazë të jetesës.
Partia opozitare akuzon gjithashtu qeverinë se ka pezulluar rritjen e pagave dhe ka refuzuar rritjen e pagës minimale në 600 euro, duke vlerësuar se kjo politikë po i shtyn punëtorët drejt varfërisë.
Në reagim thuhet gjithashtu se rritja e çmimeve të karburanteve do të reflektohet me shtrenjtim të mëtejshëm të ushqimeve, transportit dhe produkteve bazë, duke rënduar edhe më shumë buxhetet familjare.
