Njëri nga liderët e VLEN-it, Izet Mexhiti në emisionin “Click plus” në TV21 duke akuzuar BDI-në tha se e kanë harruar punën e legjitimitetit pasi kjo nuk ju konvenon tani si opozitë.
Teza tjetër, shton ai, është degradimi i çështjes shqiptare, duke krijuar një perceptim të rrejshëm.
Ta bëjmë krahasimin VLEN- Mickoski dhe BDI- Gruevski
“Krahasimin duhet ta bëjmë VLEN- Mickoski dhe BDI- Gruevski, sepse edhe numrat kanë qenë të përafërt, VMRO edhe atëherë ka pasur 60 deputetë, sot me ZNAM ka 65 deputetë dhe i ftoj qytetarët, mediat dhe BDI-në ta bëjmë krahasimin tash edhe atëherë. Atëherë ka pasur vrasje politike, raste të montuara, sot nuk ka asnjë njëra e as tjetra”, tha Mexhiti, njëherësh kryetar i komunës së Çairit.
Komunat shqiptare po e ndjejnë dorën e ngrohtë të qeverisë
Sipas tij është hera e parë që kjo qeveri ndan 40 deri 60 milionë euro për kampusin e ri të UNT-së, pastaj 20 milionë euro për të përfunduar punimet në Sheshin Skënderbeu etj.
“Nëse ndonjëherë komunat shqiptare e kanë ndjerë decentralizimin dhe dorën e ngrohtë të qeverisë ka qenë prej kredisë hungareze, pasi nuk kemi lejuar të vendosen shumë kritere. Kemi lënë një kriter, numër të banorëve, Çairi ka marrë vjet 8 milionë euro, Tetova 7,8 apo 10 milionë, edhe komunat tjera më të vogla poashtu, ka pasur një revolucion, kanë zgjidhur çështje që nuk janë zgjidhur me dekada”, nënvizoi Mexhiti.
