Deri më 30 nëntor të këtij viti, në buxhetin e shtetit, në bazë të tatimeve dhe kontributeve, janë mbledhur 3,97 miliardë euro, që është për 268 milionë euro më shumë krahasuar me të njëjtën periudhë të vitit të kaluar, deklaroi sot drejtoresha e Drejtorisë së të Ardhurave Publike (DAP), Elena Petrova.
Siç informoi Petrova, ka rritje të të ardhurave nga tatimet prej 6,5 për qind dhe rritje të kontributeve prej 8,7 për qind krahasuar me të njëjtën periudhë të vitit të kaluar.
“Trende rritëse krahasuar me vitin e kaluar ka edhe në muajin dhjetor, por ende janë në proces arkëtimet dhe pagesat nga llogaritë e pagesave për tatime. Sot po përmbledhim të dhënat e ditës së djeshme, dita tatimore për TVSH-në, dhe pas përfundimit të muajit do t’i kemi të dhënat përfundimtare për të gjithë vitin”, theksoi drejtoresha në një deklaratë për media në Qeveri.
Në lidhje me projektin e e-faturimit, ajo bëri të ditur se nga 1 janari do të fillojë implementimi pilot.
“Ndodhemi përpara një hapi kyç. Në fazën e parë do të publikojmë mekanizmin e komunikimit përmes të cilit do të realizohet shkëmbimi automatik i të dhënave ndërmjet kompanive, ndërmjet sistemeve të tyre softuerike për faturim dhe platformës së centralizuar shtetërore për e-faturim. Pas festave të Vitit të Ri do të publikohet dokumentacioni teknik, mbi bazën e të cilit kompanitë do të mund të fillojnë përshtatjen e zgjidhjeve të tyre softuerike dhe integrimin teknik, si dhe testimin e përgatitjes së e-faturës në një mjedis testues të kontrolluar”, shpjegoi Petrova.
Deri në fund të tremujorit të parë do të publikohet aplikacioni për klientët – zgjidhje falas për kompanitë më të vogla, deri në fund të tremujorit të dytë do të vendoset mjedisi prodhues, ndërsa deri në fund të tremujorit të tretë të vitit 2026 planifikohet të përfundojë testimi.
