Lëvizja Vetëvendosje ka dalë sërish në përkrahje të koalicionit VLEN në zgjedhjet lokale që do të mbahen në Maqedoni të Veriut. Ka qenë ushtruesi i detyrës së ministrit të Mjedisit në Kosovë, Hysen Durmishi, që të martën mbrëma në një tubim të këtij koalicioni ka dhënë mbështetjen për njërin krah të shqiptarëve në Maqedoni.
“Këtë tetor, shqiptarët në të dy anët e kufirit marrin pjesë në zgjedhje vendimtare lokale. Në Kosovë votohet më 12 tetor, dhe atje Vetëvendosja është ajo që VLEN. Këtu votohet më 19 tetor, dhe këtu VLEN-i ju. VLEN është forca juaj. Ashtu siç po lidhet Prizreni me Tetovën me rrugë, duhet të lidheni edhe ju me VLEN-in, të bëheni bashkë dhe të fitoni bashkë. Shqiptarët nuk kanë luksin të ndahen, sepse vetëm të bashkuar bëhen faktor. Qeveria e Kosovës, Lëvizja jonë, është me ju: politikisht, kombëtarisht dhe njerëzisht. VLEN nuk është vetëm koalicion, por mundësia që zëri shqiptar të dëgjohet qartë dhe fuqishëm”, ka shkruar ai në Facebook teksa ka shtuar se e përshëndet tubimin në emër të kryeministrit në detyrë të Kosovës, Albin Kurti.
Rundi i parë i votimeve në zgjedhjet lokale në Maqedoni të Veriut do të zhvillohet më 19 tetor, ndërsa i dyti do të mbahet dy javë më vonë, më 2 nëntor.
Janë dy blloqe kryesore të partive shqiptare që do të garojnë në këto zgjedhje. Bëhet fjalë për VLEN-in që ka grumbulluar disa parti dhe që është pjesë e pushtetit qendror dhe për Aleancën Kombëtare për Integrim të partive të tjera opozitare.
Lëvizja Vetëvendosje pati përkrahur publikisht koalicionin VLEN edhe në zgjedhjet e fundit në Maqedoni. Atë kohë, mbështetja ishte kritikuar nga analistë e parti të tjera duke u cilësuar si ndërhyrje në një shtet tjetër.
