Kryeministri Hristijan Mickoski sot nuk ka kursyer kritika në adresë të BDI, duke shtuar se ““kështu nuk shkon”, kur bëhet fjalë për fitimin e votave me patriotizëm të rremë.”
Sipas tij, BDI ka për qëllim të provokojë zgjedhje të parakohshme parlamentare, duke u bërë thirrje që të mos shpresojnë.
“Ata luajnë me kartën – kujtesë e shkurtër. Kështu nuk shkon. Unë u bëj thirrje të gjithë qytetarëve se këtu po zgjedhin mes konceptit që për 20 vite e ka shkatërruar Maqedoninë dhe që nuk ka asnjë lidhje me të drejtat, dhe atyre që duan të ndërtojmë së bashku të ardhmen,” deklaroi Mickoski.
Sipas tij, kjo Qeveri ka fituar mbi 600 mijë vota dhe se do të jetë fituese e zgjedhjeve lokale.
“Kurrsesi ne nuk do të tërhiqemi nga negociatat me BE-në,” deklaroi sot (15 gusht) kryeministri Hristijan Mickoski, i pyetur për komentin rreth iniciativës së paraqitur nga ish-deputetja dhe kryetarja e DOM-it, Liljana Popovska, në Gjykatën Kushtetuese, për kontestimin e Protokollit nga takimi i dytë i Komisionit të përbashkët ndërqeveritar me Bullgarinë. Para disa ditësh, Gjykata Kushtetuese hapi një lëndë për këtë iniciativë.
Kryeministri Mickoski, i cili mori pjesë në prezantimin e pajisjeve të reja të ardhura nga SHBA në kazermën “Jane Sandanski” në Shtip, përcolli mesazhin se është më mirë të pritet vendimi i Gjykatës.
“Kurrsesi ne nuk do të tërhiqemi nga negociatat me BE-në, kjo nuk është qëllimi i kësaj Qeverie, përkundrazi, qëllimi ynë është të bëhemi pjesë e BE-së. Sa i përket parashtresës së ish-deputetes Popovska, ajo duhet t’ju japë përgjigje, dhe të presim që Gjykata Kushtetuese të marrë një vendim përfundimtar lidhur me këtë iniciativë,” tha Mickoski.
