Të paktën 161 persona janë ende të zhdukur në një qark të vetëm të Teksasit katër ditë pas përmbytjeve vdekjeprurëse dhe shkatërruese që goditën disa pjesë të shtetit javën e kaluar, ka thënë Guvernatori Greg Abbott, teksa shpresa që ata të gjenden gjallë po shuhet.
Të zhdukurit në Qarkun Kerr i cili është goditur rëndë përfshijnë pesë kampistë dhe një anëtare stafi nga Camp Mystic, një kamp veror i vajzave të krishtera i vendosur në brigjet e lumit Guadalupe.
Të paktën 109 persona kanë vdekur në katastrofë, përfshirë 94 vetëm në zonën e Kerrville, ka thënë Abbott në një konferencë për shtyp të martën.
Teksasi nuk është i vetmi. Edhe Meksika e Re u godit nga përmbytje të menjëhershme, teksa shërbimi Kombëtar i Motit (NËS) paralajmëroi për përmbytje intensive të martën në mbrëmje.
Abbott ka thënë se ka shumë të ngjarë që të shtohen më shumë të zhdukur në listë në ditët në vijim dhe u bëri thirrje njerëzve të raportojnë këdo që mendojnë se është i zhdukur.
Ekipet e ndihmës nga agjenci të ndryshme po punojnë së bashku në përpjekjet e shpëtimit, përfshirë agjentë nga patrullimi kufitar, FBI-ja dhe Garda Kombëtare.
Më shumë se 250 ekipe ndihmëse nga agjenci të ndryshme janë caktuar vetëm në zonën e Kerrville për të ndihmuar në kërkim-shpëtim.
