Përmbaruesi i Shkupit, Andreja Bunevski ka publikuar shpalljen për shitjen e qendrës tregtare “Soravia”, e cila gjendet në qendër të Shkupit dhe me të cilën operon nipi i Ali Ahmetit, Drin Ahmeti. Në përfund, që është publikuar në ueb faqen e Odës së Përmbaruesve, thuhet se çmimi fillestar për objektin është 1.377.978.526 denarë, ose rreth 22.406.000 euro. Përmbaruesi thotë se objekti shitet për shkak të një borxhi prej rreth 930 mijë eurosh ndaj bankës Banka e parë investuese.
Shpallja është publikuar më 24 mars, ndërsa ankandi do të mbahet më 24 prill në zyrën e përmbaruesit Bunevski. Tre përmbarues të tjerë janë përfshirë në ekzekutimin e kërkesave. Në përfundimin për ankandin renditen të gjitha pasuritë e paluajtshme të regjistruara kadastrale të qendrës “Soravia”.
Në fillim të muajit mars, Soravia Invest e ka fshirë nga regjistri qendror edhe menaxherin bullgar Valeri Rusev, kështu që tani menaxhere e vetme është Egzona Rizmani. Që nga dhjetori i vitit të kaluar, kompania është në pronësi të një kompanie austriake e lidhur me Hanno Soravia, ish-pronari me mbiemrin e të cilit u emërua objekti. Drin Ahmeti aktualisht nuk figuron si pronar apo menaxher, por në një intervistë për Telma në janar, ai ka pohuar se operon dhe menaxhon qendrën dhe se shitja dhe marrja e objektit nga pronari aktual austriak do të përfundojë brenda disa muajsh.
Në periudhën nga gushti 2023 deri në zgjedhjet e majit 2024, në llogarinë e kompanisë së Drin Ahmetit “Thor” janë derdhur rreth 7.5 milionë euro si kredi nga biznesmeni amerikan Nik Mehmeti, portofoli i biznesit të të cilit përfshin edhe drejtimin e striptiz bareve në Dallas të Teksasit dhe menaxhimin e një Ode Tregtare Amerikano-Shqiptare.
Kompania “Soravia Invest” aktualisht ka llogari bankare të bllokuar dhe borxh milionësh ndaj Drejtorisë së të Ardhurave Publike.
Blerja dhe shitja e “Soravia” është nën hetim edhe nga Prokuroria për Ndjekjen e Krimit të Organizuar dhe Korrupsionit, e cila është në pritje të ndihmës juridike amerikane lidhur me pagesat.
Drin Ahmeti, së fundmi deklaroi se Nik Nazar Mehmeti ka investuar paratë e marra nga shitja e aksioneve në gjigantin e IT-së Nvidia dhe se për këtë i ka njoftuar autoritetet në Maqedoninë e Veriut.
