Ofensiva e rrufeshme e opozitës kryengritëse në fillim të këtij muaji e kapi klanin sundues sirian në befasi, shkruan agjencia AFP. Presidenti Bashar al-Assad iku në Rusi më 8 dhjetor, duke lënë pas shumë nga bashkëpunëtorët e tij, disa prej të cilëve kërkuan strehim në vendet fqinje.
Sipas dy burimeve, presidenti i rrëzuar, i cili iku në Moskë nëpërmjet aeroportit ushtarak rus në Hmeimim në bregdetin sirian, shoqërohej nga vetëm një pjesë e vogël e njerëzve të besuar. Midis tyre ishin aleati i tij i ngushtë dhe kryesekretari për çështjet presidenciale Mansour Azzam, si dhe këshilltari i tij ekonomik Yassar Ibrahim, i cili mbikëqyr perandorinë financiare të Assad-it dhe gruas së tij Asma.
Ai nuk i tha vëllait të tij për planet
“Ai u arratis me sekretaren dhe arkëtarin e tij,” tha një person i brendshëm, i cili donte të mbetej anonim.
Vëllai i Basharit, Maher al-Assad, komandant i Divizionit të Katërt elitar të ngarkuar me mbrojtjen e Damaskut, nuk ishte në dijeni të planeve të vëllait të tij. Duke i lënë njerëzit e tij në baltë, Maher mori një rrugë tjetër, duke ikur me helikopter në Irak përpara se të udhëtonte për në Rusi, sipas një burimi ushtarak sirian.
Një burim i sigurisë irakiane i tha AFP-së se Maher mbërriti në Irak me aeroplan më 7 dhjetor dhe qëndroi atje për pesë ditë. Gruaja e Maher, Manal al-Jadaan dhe djali i tij hynë në Liban për një kohë të shkurtër përpara se të niseshin nëpërmjet aeroportit të Bejrutit, tha ministri i Brendshëm libanez Bassam Mawlawi, pa bërë të ditur destinacionin e tyre përfundimtar.
Një tjetër “peshë e rëndë” nga qeveria e Assad-it, ish-kreu i aparatit të sigurisë siriane, Ali Mamlouk, iku në Rusi nëpërmjet Irakut, tha një burim ushtarak sirian. Djali i tij kaloi nëpër Liban përpara se të shkonte në një destinacion tjetër, sipas një burimi libanez të sigurisë.
Persona të kërkuar
Ministria e Brendshme e Irakut mohoi të hënën praninë e Maher al-Assad ose Mamlouk në Irak. Të dy janë në kërkim, pasi për ta është lëshuar një urdhër.
Maher – dhe Bashar al-Assad – kërkohen nga Franca për bashkëpunim të dyshuar në krime lufte në lidhje me sulmet kimike në Siri në gusht 2013. Gjykatat franceze kanë dënuar tashmë Mamlouk dhe Jamil Hassan, ish-kreun e inteligjencës së forcave ajrore siriane, me burgim të përjetshëm për krime kundër njerëzimit dhe krime lufte.
Të premten, autoritetet libaneze morën një alarm nga Interpoli që transmetonte një kërkesë të SHBA për të arrestuar Hassan-in dhe për t’ia dorëzuar atë autoriteteve amerikane nëse ai hyn në vend. Shtetet e Bashkuara e akuzojnë atë për “krime lufte”, duke përfshirë mbikëqyrjen e sulmeve me bomba me fuçi ndaj popullit sirian që vranë mijëra civilë.
Një burim në gjyqësorin libanez i tha AFP-së se ata nuk kishin konfirmim për praninë e Hassan-it në Liban, por siguruan se ai do të arrestohej nëse gjendej.
Ikje në minutën e fundit
Një arratisje të nxituar bënë edhe figura të tjera të shquara.
Bouthaina Shaaban, një ish-përkthyese për Hafez al-Assad – babai i Basharit që krijoi sistemin brutal të qeverisjes që trashëgoi djali i tij – iku në Liban natën e 7-8 dhjetorit. Shaaban, një këshilltare e gjatë politike e Bashar al-Assad-it, më pas udhëtoi për në Abu Dhabi, sipas një miku të saj në Bejrut.
Kifah Mujahid, udhëheqësi i Brigadave Baath – krahu ushtarak i ish-partisë në pushtet të Sirisë – iku në Liban me varkë, tha një burim partiak për AFP. Zyrtarë të tjerë janë strehuar në qytetet e tyre në rajonet e Alevit, i thanë disa prej tyre AFP. Assad vjen nga pakica alavite e Sirisë.
Megjithatë, jo të gjitha përpjekjet për arratisje ishin të suksesshme. Ihab Makhlouf, kushëriri i Bashar al-Assad-it dhe një biznesmen i shquar, u vra më 7 dhjetor teksa po përpiqej të largohej nga Damasku. Vëllai i tij binjak Iyad u plagos në të njëjtin incident, tha një zyrtar ushtarak nga ish-qeveria.
Vëllai i tyre më i madh, Rami Makhlouf, i konsideruar dikur njeriu më i pasur në Siri dhe simbol i korrupsionit të regjimit, arriti të mbijetojë. Rami, i cili ishte i favorizuar në regjimine Assad-it vite më parë, besohet të jetë në Emiratet e Bashkuara Arabe.
Disa figura të tjera pranë qeverisë së Assad-it kanë dezertuar në Liban, duke përfshirë Ghassan Belal, kreun e zyrës së Maher dhe biznesmenët Mohammed Hamsho, Khalid Qaddur, Samer Debs dhe Samir Hassan.
Një ish-ministër libanez me lidhje të ngushta me Sirinë tha se disa oficerëve të lartë ushtarakë sirianë iu lejua kalimi i sigurt në bazën ajrore Hmeimim nga Moska. Ata u shpërblyen për udhëzimin e trupave të tyre që të mos i rezistonin ofensivës rebele për të shmangur gjakderdhjen e mëtejshme, tha një burim i AFP. /tesheshi.com/
