Sekretari i përgjithshëm i Alternativës, Zeqirija Ibrahimi, u është përgjigjur akuzave fyese të opozitës së ardhshme shqiptare, BDI-së. Ai ka thënë se kjo opozitë, ka një qasje shumë të gabuar kundrejt pushtetit të ardhshëm kur i quan me emra fyes. Në vazhdim, ja postimi i plotë i Ibrahimit.
“Kualifikimet e përfaqësuesve të 107 mijë shqiptarëve me ofendime e fyerje të tipit “rrahmanmorina”, “vasalë”, “sejdobajramoviqë” e etiketa të tjera të padenja, përveçse flasin për nervozën dhe dëshpërimin e opozitës së ardhshme, flasin keq edhe për moralin e tyre politik dhe njerëzor.
Kur ata janë në opozitë, 107 mijë shqiptarë të tjerë janë “shqiptarë të ndershëm”. Boll keq dhe boll rëndë.
Këso ofendimi shqiptarëve nuk u ka bërë deri sot asnjë politikan maqedonas dhe ky diskurs i ri i opozitës së ardhshme është një bidat që lë gjurmë të këqija jo vetëm mbi demokracinë dhe pluralizmin, por edhe në marrëdhëniet tona ndërnjerëzore e ndërshqiptare.
Besoj se me kalimin e kohës do të mësohen me gjuhën opozitare, por bëjnë mirë të reflektojnë më herët. Për të mirën e tyre e kam.”, ka thënë Ibrahimi. (alfax.mk)
