Përpjekja e dytë për të zgjedhur një kontraktor për ndërtimin e interkonektorit të gazit me Greqinë me shumë gjasa do të jetë e suksesshme. Banka Europiane për Investime i ka dhënë dritën jeshile ofertës së kompanisë nga Kumanova, Rapid Build.
Ministria e Energjetikës konfirmoi për TV21 se banka i ka njoftuar se nuk ka vërejtje për ofertën e kompanisë, e cila duhet ta realizojë ndërtimin e interkonektorit për 60 milionë euro.
Afatet për ankesa tani po mbarojnë dhe ministria pret që marrëveshja të nënshkruhet deri në fund të shkurtit. Interkonektori nga pala greke është pothuajse i përfunduar. Gjatësia e përgjithshme është 123 kilometra, ndërsa pjesa maqedonase është 67 kilometra nga Gjevgjelia deri në Negotinë.
Kjo lidhje me fqinjin jugor duhet të sigurojë gaz nga burime të shumta. Aktualisht, ne kemi vetëm një lidhje ndërkufitare të gazit përmes Bullgarisë.
