Kostoja e investimit të përgjithshëm për një prej objekteve më të rëndësishme të kulturës në Shkup parashikohet të jetë 16 milionë euro. Salla universale duhet të jetë gati për tre vjet, edhe pse për rreth një vit, që kur Ministria e Kulturës e mori nën ingerencat e saj këtë objekt nuk ka mundur të bëjë asgjë për shkak të dokumentacionit jo të plotë
Shkup, 16 shkurt – Ministria e Kulturës ka zhbllokuar procesin për rikonstruktimin e Sallës Universale, e cila prej dy vitesh ka qëndruar e hapur dhe jofunksionale. Punimet kanë filluar këto ditë, ndërsa pritet të përfundojnë brenda tre vitesh. Kostoja e investimit të përgjithshëm për një prej objekteve më të rëndësishme të kulturës në Shkup parashikohet të jetë 16 milionë euro. Për punët që do të kryhen këtë vit, Ministria e Kulturës ka siguruar 120 milionë denarë. Parashikohen mjete edhe për dy vitet e ardhshme – 443 milionë denarë, ka informuar ministrja e Kulturës Bisera Kostadinovska Stojçevska.
Që kur Ministria e Kulturës mori nën ingerenca e saj këtë objekt nuk ka mundur të bëhet asgjë, për shkak të dokumentacionit jo të plotë. 67 milionë denarë fillestarë të parashikuar për këtë ndërmarrje janë kthyer sërish në buxhetin e shtetit, sepse nuk ka pasur mundësi të shfrytëzohen, për shkak të procesit të stërzgjatur të marrjes së dokumentacionit, theksoi ministrja. Punimet kanë filluar me pastrimin e mbeturinave dhe inerteve në objekt dhe jashtë tij.
“Me marrjen e dokumenteve të Sallës Universale nuk na është dhënë dokumentacioni i plotë nga Qyteti i Shkupit. I kemi kërkuar përmes Ministrisë së Drejtësisë, përmes Prokurorit të Përgjithshëm të Shtetit. Prandaj asgjë nuk mund të lëvizej deri më tani”, sqaroi ministrja dhe shtoi se Ministria e Kulturës ka audituar projektin dhe ka marrë një opinion pozitiv me të gjitha ndryshimet që janë paraparë në të. Kontraktori është i njëjti subjekt që ka nisur rikonstruksionin.
Rikonstruksioni i sallës, i filluar në kohën e kryetarit të Shkupit, Petre Shilegov, në vitin 2021 u ndërpre nga kryetarja Danella Arsovska. Ajo ishte e bindur se ishte një projekt që nuk është i sigurt. Qyteti, me vendim të Këshillit, vitin e kaluar vendosi që t’ia kalojë përkohësisht autoritetin për Sallën Universale Ministrisë së Kulturës, në mënyrë që rikonstruksioni të përfundojë. Ndërsa me përfundimin e punimeve Qeveria do t’ia rikthejë sërish nën kompetent këtë objekt Qytetit të Shkupit. (koha.mk)
