Zëvendëskryeministri për qeverisje të mirë, Arben Fetai, ka nisur një vizitë zyrtare disaditëshe në Nju Jork dhe Uashington të Shteteve të Bashkuara të Amerikës (SHBA).
Gjatë qëndrimit të tij, Fetai do të zhvillojë takime të nivelit të lartë me përfaqësues të institucioneve amerikane, me zyrtarë të sistemit të Kombeve të Bashkuara, si dhe me përfaqësues të komunitetit shqiptar nga Maqedonia e Veriut që jetojnë dhe kontribuojnë në SHBA.
Pika qendrore e vizitës është pjesëmarrja në Konferencën e dytë globale për shfrytëzimin e të dhënave për përmirësimin e matjes së korrupsionit organizuar nga Programi për zhvillim i Kombeve të Bashkuara (UNDP), ku Fetai do të ndajë përvojat dhe angazhimet e Qeverisë së Maqedonisë së Veriut në luftën kundër korrupsionit dhe forcimin e transparencës.
“Poashtu, zëvendëskryeministri Fetai do të marrë pjesë në manifestimet e organizuara nga shoqatat shqiptare në Nju Jork me rastin e Festave të Nëntorit. Në vijim të agjendës, parashihen takime të tjera pune që synojnë thellimin e bashkëpunimit dypalësh dhe promovimin ndërkombëtar të reformave në fushën e qeverisjes së mirë, sundimit të ligjit dhe integritetit institucional”, thuhet në kumtesën e kabinetit të Fetait.
