Kryeministri i vendit, Albin Kurti ka folur për rastet e vrasjeve që kanë ndodhur për tri ditë rresht në Kosovë.
Kurti gjatë mbledhjes së Qeverisë i bëri thirrje organeve të drejtësisë që të hetojnë me seriozitet këto raste për shkaqet, rrethanat dhe predispozitat e dorasëve.
Ai po ashtu tha se vrasja është akti më i rëndë që mund të bëhet.
“Fillimisht dua të ndaj brengën dhe shqetësimin në lidhje me katër rastet e fundit të ndodhura tri ditët e fundit. Ftoj organet e rendit, hetuesin dhe drejtësinë që të hetojnë me seriozitetin më të lartë shkaqet, rrethanat dhe predispozitat e dorasëve në mënyrë që edhe të vihet drejtësi edhe të parandalohen raste të këtilla në të ardhmen. Vrasja është akti më i rëndë që mund të ia bëj njeriu-njeriut. Ajo asnjëherë nuk guxon të normalizohet.
Vrasja është jo vetëm vrasje e njeriut, por edhe e shoqërisë në të cilën ai njeri bënte pjesë. Gjithë vendi është tronditur dhe është lënduar nga kjo seri e vrasjeve që duhet të ndalohet dhe dënohet. Na duhet analizë e kujdesshme profesionale, veprim i menjëhershëm institucionale dhe reflektim shoqëror që adreson dhunën që kemi parë në këto ditët e fundit”, ka thënë Kurti.
Ai po ashtu tha se ngjarjet e rënda kanë ndodhur pikërisht në shënimin e javës kur NATO-ja 26 vite më parë kishte filluar bombardimet në Kosovë për të ndalur gjenocidin e Serbisë.
“Kjo është thirrje për të gjithë ne edhe për faktin që fillojmë javën për fillimin e bombardimeve të NATO-s në Kosovë për ta ndal gjenocidin e Serbisë dhe përkujtojmë masakrat e njëpasnjëshme të aparatit shtetërorë të Serbisë që synonte shfarosjen e popullit shqiptar”, ka thënë Kurti.
Ndryshe, brenda tri ditëve në vend ndodhen katër vrasje.
Dy në rajonin e Vushtrrisë, ku një 19-vjeçar vrau një tjetër në Vushtrri, rasti tjetër në Stanovc të Vushtrrisë, ku një person vrau ish- punëtoren e tij dhe më pas veten, si dhe mbrëmjen e së martës një person mbeti i vdekur nga gjuajtjet me armë dhe një tjetër i plagosur.
