Edhe këtë vit, siç është parë nga maturantët, fokusin e kanë te Fakultetet e Shkencave Kompjuterike dhe Fakultetet e Mjekësisë. Në ndërkohë, interesimi për shkencat matematiko-natyrore po bie çdo vit e më shumë.
Shkup, 11 qershor – Universiteti “Shën Kirili dhe Metodi” në Shkup ka shpallur Konkursin për regjistrimin e studentëve në ciklin e parë të programeve të studimit në vitin akademik 2023/2024. Universiteti më i madh në vend ka gjithsej 10.473 vende falas për studentët e rinj këtë vit, nga të cilat 5074 janë për studentë të rregullt që financohen nga Buxheti dhe paguajnë 200 euro pjesëmarrje, 4439 janë për studentë të rregullt me shkollim, të cilët paguajnë 400 euro secili, dhe 960 janë për studentë me kohë të pjesshme. Fakulteti i Shkencave të Informacionit dhe Inxhinierisë Kompjuterike do të marrë këtë vit më së shumti studentë, pra gjithsej 1150, pasuar nga Fakulteti Juridik me 1.055 studentë. Nga ana tjetër, edhe këtë vit siç është parë nga maturantët, fokusin e kanë te Fakultetet e Shkencave Kompjuterike dhe Fakultetet e Mjekësisë. Ndërsa për sa i përket shkencave matematiko-natyrore interesimi bie çdo vit e më shumë.
E për këtë eksperti i arsimit, prof.dr. Xheladin Murati fajësoi institucionet arsimore dhe tha për gazetën KOHA se mungesa e orientimit profesional i lë nxënësit të zgjedhin vetë studimet, shpesh në fusha atraktive për punësim dhe përfitime.
“Në shkollat tona mungon orientimi profesional i nxënësve dhe institucionet arsimore nuk kanë aftësi të bëjnë seleksionimin e nxënësve sipas aftësive që posedojnë. Kjo çështje ka mbetur në mëshirën e vet nxënësit të vendos se çka do të studion dhe është krejt normale që ata përcaktohen për fakultete dhe degë studimore që janë atraktive dhe të cilat sigurojnë punësim dhe përfitime. Ne si vëzhgues të anshëm duket se e vëzhgojmë nga një dimension më të gjerë, por nuk duhet paragjykuar prirjet e nxënësve. Studentët e ardhshëm janë para alternativave, kjo ndodh edhe nga ‘bumi’ rinor për të vazhduar arsimimin në fusha strategjike, sepse kjo është edhe një çlirim iluzionar i tyre” theksoi profesori universitar Murati.
Ai shtoi se faji kryesor qëndron te institucionet tona të cilat nuk kanë instrumente për të përcaktuar aftësitë dhe interesat e nxënësve dhe studentëve, siç ndodh në shtete evropiane. Ndërkaq, afati i parë i aplikimit për kandidatët që renditen vetëm sipas notave të shkollës së mesme është data 30 dhe 31 gusht, i dyti më 18 dhe 19 shtator dhe i treti më 28 shtator. Pas publikimit të listave preliminare dhe përfundimtare, regjistrimi i kandidatëve do të bëhet në datat 12 dhe 13 shtator, 26 shtator dhe 30 shtator, përkatësisht sipas afatit të regjistrimit. Afati i parë për aplikim për kandidatët që renditen sipas suksesit në arsimin e mesëm dhe sipas testit të njohurive dhe aftësive është data 30 dhe 31 gusht, ndërsa testimi i njohurive është më 1 shtator. Afati i dytë për këta kandidatë është data 18 dhe 19 shtator, kurse testimi i njohurive më 20 shtator. Ndërsa, afati i tretë është 28 shtatori.
Pas publikimit të listave preliminare dhe përfundimtare, regjistrimi i kandidatëve do të bëhet në datat 12 dhe 13 shtator, 28 shtator dhe 30 shtator, përkatësisht sipas afatit të regjistrimit. Ndër të tjera, sipas të dhënave të fundit të Entit Shtetëror të Statistikave (ESHS), të marra në bazë të raporteve të pranuara, në Republikën e Maqedonisë së Veriut, në vitin akademik 2022/2023 janë regjistruar gjithsej 53.821 studentë. Në vitin e parë të studimeve janë regjistruar 15.097 studentë ose 28.1 për qind. (koha.mk)
