Në një atmosferë madhështore, VLEN hapi zyrtarisht shtabin zgjedhor në Bërvenicë, ku u prezantua kandidati për kryetar të Komunës, Haqim Ramadani. Në këtë ngjarje që u shndërruar në tubim të madh qytetarësh morën pjesë liderët e koalicionit, të cilët shprehën bindjen e plotë se 19 tetori do të shënojë kthesën e madhe edhe për këtë komunë.
Njëri nga liderët e VLEN, Izet Mexhiti, në fjalën e tij theksoi rëndësinë e këtyre zgjedhjeve dhe nevojën që vota shqiptare në Bërvenicë të mos shpërdorohet. “Shumica e Bërvenicës është shqiptare. Nuk duhet të lejojmë përçarje artificiale që vetëm i shërben kundërshtarëve tanë. Vota e bashkuar e shqiptarëve duhet të shkojë tek Haqim Ramadani – një njeri që e njeh pushtetin lokal dhe qendror, dhe që e di çfarë i duhet kësaj komune”, tha Mexhiti, duke kujtuar se Ramadani ka përvojë si sekretar i komunës dhe si drejtor i Inspektoratit të Vetëqeverisjes Lokale.
Kryetari i Lëvizjes Besa, Bilall Kasami, u bëri thirrje të gjithë forcave opozitare dhe qytetarëve të përgjegjshëm që të mbështesin kandidaturën e Haqim Ramadanit. “Opozita duhet të tregojë maturi dhe përgjegjësi. Është koha që Bërvenica t’u kthehet shqiptarëve dhe kjo garantohet vetëm me votën për Ramadanin dhe për listën e VLEN-it”, tha Kasami.
VLEN thekson se banorët e Bërvenicës meritojnë zhvillim të vërtetë, infrastrukturë moderne dhe një qeverisje që u shërben qytetarëve, jo eksperimente dhe ndarje artificiale. 19 tetori është dita e unitetit, dita e vendimit për të ardhmen.
Bërvenica ka nevojë për ndryshim. Haqim Ramadani është garanca e këtij ndryshimi. VLEN për Bërvenicën!
