Koalicioni VLEN ka reaguar ashpër ndaj nismës së BDI-së në Çair për formimin e një “SPAK-u lokal”, duke e cilësuar atë si një përpjekje propagandistike dhe jo si një mekanizëm real për luftimin e korrupsionit.
Nga VLEN thonë se nëse kjo strukturë synon vërtet transparencë dhe përgjegjësi, atëherë hetimet duhet të nisin nga vetë drejtuesit e BDI-së, për të dëshmuar se nuk bëhet fjalë për një spektakël politik, por për një proces serioz dhe të paanshëm ndaj çdo zyrtari, pa përjashtim.
Reagimi i plotë:
BDI në Çair shpall me bujë formimin e një “SPAK-u lokal”, sikur të kishte zbuluar “Amerikën”. Por pyetja që lind menjëherë është: a do ta kapë ky SPAK edhe kryesinë e vet? Apo është vetëm një teatër i radhës për të mashtruar qytetarët?
Sepse korrupsioni nuk është thjesht ndërtim pa leje apo tender komunal. Ai ka fytyra të njohura: Faton Ahmeti, për dyshimet e keqpërdorimit të fondeve në FSSH, Arber Ademi, si ministër i Arsimit me lëndë të hapura për abuzime, Bujar Osmani, për rastin famëkeq “Pacienti”, dhe shumë të tjerë që sot ulen në kryesinë e BDI-së si të paprekshëm.
VLEN e përshëndet këtë “SPAK” të BDI-së dhe i sugjeron që, nëse vërtet është për veprim dhe jo për spektakël, të fillojë hetimet pikërisht nga këta emra. Punën e parë që duhet ta bëjë është të vendosë komunikim me SPAK-un e Shqipërisë dhe të kërkojë ekstradimin e Artan Grubit, simbol i arrogancës dhe abuzimit të pushtetit.
Nëse ky SPAK është serioz, le të provojë të hetojë të paprekshmit e vet. Vetëm atëherë qytetarët do ta besojnë se transparenca nuk është fasadë, por realitet. Deri atëherë, kjo mbetet një shfaqje tallëse, një “SPAK për Facebook” dhe jo për drejtësi
