Kryetari i Komunës së Çairit, Visar Ganiu, gjatë tërë muajit të Ramazanit dhe veçanërisht në prag të festës së Fitër Bajramit, po angazhohet për një mjedis sa më të pastër për banorët e komunës.
Ekipet komunale janë në terren për të siguruar pastërtinë e lagjeve, duke ndërmarrë aksione të rregullta për pastrimin e hapësirave publike. Ganiu ka theksuar se një ambient i pastër dhe i rregullt është prioritet për të, veçanërisht gjatë kësaj periudhe të shenjtë për besimtarët myslimanë.
“Pastërtia e qytetit është përgjegjësi e përbashkët, dhe ne po bëjmë maksimumin që Çairi të jetë sa më i pastër dhe i rregullt për qytetarët tanë,” ka deklaruar kryetari Ganiu.
Ky angazhim i komunës vjen si pjesë e përkushtimit të vazhdueshëm për përmirësimin e kushteve jetësore në Çair, duke krijuar një ambient të pastër dhe të denjë për të gjithë banorët.
