Gazetari i njohur nga Kosova, Vebi Kajtazi, ka reaguar pas futjes së Artan Grubit, një prej figurave kyçe të BDI-së, në listën e zezë të Shteteve të Bashkuara të Amerikës për korrupsion. Në një koment të tij publik, Kajtazi vlerësoi këtë si një akt që “legjitimon ndërhyrjen” e kryeministrit të Kosovës, Albin Kurti, në Maqedoninë e Veriut përballë politikave të Ali Ahmetit dhe partisë së tij.
“Sot Amerika ‘legjitimoi’ ndërhyrjen e Albin Kurtit në Maqedoninë e Veriut. Futi në listë të zezë njeriun e Ali Ahmetit, Artan Grubin,” shkruan Kajtazi, duke sugjeruar se Ahmeti tani duhet të distancohet publikisht nga Grubi dhe ta përjashtojë nga partia, përndryshe do të interpretohet si bashkëpunëtor në “pislleqe”.
Megjithatë, gazetari paralajmëron se ky veprim i SHBA-së mund të ketë pasoja edhe për vetë qeverinë e Albin Kurtit në Kosovë. “Amerika mund të fusë në listë të zezë edhe njerëz të Kurtit. Shumë shpejt madje,” shton ai, duke lënë të kuptohet se standardet e njëjta mund të aplikohen edhe në Kosovë.
Ky koment ka ngjallur debat në rrjetet sociale, duke ndarë opinionet për rolin e SHBA-së dhe ndikimin e saj në politikat rajonale.
