Gaza
Ushtria izraelite, e cila depërtoi në lagjen Shejaiya në pjesën lindore të qytetit të Gazës, la pas një automjet ushtarak të shkatërruar pas betejave me fraksionet palestineze, raporton Anadolu.
Një video e regjistruar nga një aktivist palestinez, paraqet mbetjet e një transportuesi të blinduar izraelit të djegur në rrugën “Bagdad” në lagjen Shejaiya. Banorët e lagjes thanë se automjeti i blinduar u shkatërrua pak ditë më parë pasi u vu në shënjestër nga palestinezët me një raketë antitank.
Që nga 28 qershori, Shejaiya ka qenë dëshmitare e një operacioni ushtarak tokësor. Ushtria izraelite njoftoi se kishte filluar një operacion tokësor në lagje, i treti i këtij lloji që nga fillimi i ofensivës më 7 tetor. Dëshmitarët okularë për Anadolu thanë se në orët e fundit, disa palestinezë arritën të hyjnë në periferi të lagjes, nga ku ishin tërhequr automjetet ushtarake izraelite dhe nxorën disa viktima nga rrugët dhe shtëpitë e shkatërruara.
Sipas dëshmitarëve, lagja Shejaiya ka qenë dëshmitare e betejave të ashpra midis fraksioneve të rezistencës palestineze dhe ushtrisë izraelite ditët e fundit.
Duke shkelur rezolutën e Këshillit të Sigurimit të OKB-së që kërkon armëpushim të menjëhershëm, Izraeli është përballur me reagimin ndërkombëtar në mes të ofensivës brutale të vazhdueshme në Gaza që nga sulmi i 7 tetorit nga grupi palestinez Hamas.
Të paktën 38.200 palestinezë janë vrarë që atëherë, kryesisht gra dhe fëmijë si dhe mbi 88 mijë të tjerë janë plagosur. Nëntë muaj pas luftës izraelite, pjesë të mëdha të Gazës janë kthyer në gërmadha mes një bllokade gjymtuese të ushqimit, ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë (GJND), vendimi i fundit i së cilës e urdhëroi Tel Avivin të ndalojë menjëherë operacionin ushtarak në qytetin jugor Rafah, ku mbi 1 milion palestinezë kanë kërkuar strehim nga lufta përpara se qyteti të pushtohej më 6 maj.
