Ish-ministri i Shëndetësisë dhe deputet aktual, Venko Filipçe, ish-ministrja e Mbrojtjes dhe deputetja aktuale, Slavjanka Petrovska, si dhe drejtori aktual i Zonave Zhvillimore Teknologjiko-Industriale, Jovan Despotovski, hyjnë në garë për pozitën udhëheqëse të Lidhjes Socialdemokrat të Maqedonisë (LSDM). Të tre pretendentët paraqitën dje kandidaturat e tyre, duke theksuar nevojën e rindërtimit të partisë.
Para selisë së LSDM-së, Filipçe tha se së bashku me kandidaturën po dorëzon një program të bazuar në informata, sugjerime dhe kërkesa. Ai theksoi se në garë po hyn i vetëm, sepse beson se kushdo që do të zgjidhet kryetar duhet ta bëjë ekipin pas zgjedhjeve.
Ish-ministrja e Mbrojtjes, Petrovska, e cila është edhe kryetare e Bordit Qendror të LSDM-së, tha se nëse zgjidhet kryetare e LSDM-së, do të iniciojë debate të shpeshta brenda partisë, të cilat, siç tha, zyrtarët e mëparshëm të partisë i kanë vendosur në sfond. Ajo ka theksuar se ka marrë mbështetje nga disa ish-funksionarë partiakë, por siç tha, nuk do të keqpërdorte emrat e tyre.
Despotovski, nga ana tjetër ka paralajmëruar se nëse zgjidhet kryetar i LSDM-së do të zbatojë një mekanizëm të ri përmes të cilit partia do veprojë si një opozitë konstruktive. Ai theksoi se do të formojë një qeveri në hije, për të cilën tha se do të jetë një opsion që qytetarët të mendojnë dhe të krahasojnë.
Procedura e aplikimit për të parin e partisë ka nisur më 31 maj dhe vazhdon edhe sot. Zgjedhjet e brendshme partiake janë shpallur me vendim të Bordit Ekzekutiv dhe do të mbahen më 30 qershor të këtij viti.
