Zyrtarë të Presidencës së Kosovës dhe të Qeverisë janë përplasur në rrjete sociale, pas njoftimit të presidentes Vjosa Osmani se ka kërkuar nga Qeveria që të pezullojë tarifat e importit për të gjitha produktet nga Shtetet e Bashkuara të Amerikës.
Kërkesa e presidentes Vjosa Osmani drejtuar Qeverisë për pezullimin e tarifave ndaj mallrave amerikane, është kritikuar ashpër nga Qeveria. Por, kjo është vlerësuar shumë nga kongresmenë amerikanë.
Presidentja e Kosovës, Vjosa Osmani ka kërkuar të enjten nga Qeveria që të pezullojë tarifat e importit prej 10 për qind për produktet nga Shtetet e Bashkuara të Amerikës, shkruan gazeta online Reporteri.net.
Me këtë veprim sipas Osmanit, do të përcillej mesazhi se Kosova është e gatshme për marrëdhënie më të fortë me SHBA-në.
“Jam e bindur se ky veprim do të hapë mundësi të reja për krijimin e vendeve të punës, shkëmbimin e teknologjisë dhe rritjen afatgjatë ekonomike”, ka shkruar tutje Osmani në platformën “X”.
Sipas saj, më shumë se veprim ekonomik, ky është një objektiv i politikës së jashtme, duke riafirmuar angazhimin e qëndrueshëm për aleancën Kosovë-SHBA, të ndërtuar mbi vlerat e përbashkëta të lirisë dhe mbështetjes që vazhdon prej dekadash.
E asaj në mbështetje i kanë dalë disa kongresmenë amerikanë.
Kryetari i komitetit të jashtëm amerikan Keith Self, ka reaguar pas kërkesës së presidentes së Kosovës, Vjosa Osmani ndaj qeverisë së prirë nga Albin Kurti për të hequr taksat për importet nga SHBA-ja.
Ai tha se me këtë veprim presidentja Osmani u ka dhënë leksion lidershipi udhëheqësve të tjerë evropianë.
“Ky është një mësim i jashtëzakonshëm për udhëheqësinë që partnerët tanë evropianë duhet ta marrin parasysh.”, ka shkruar ai.
Edhe kongresmeni republikan Carlos A.Gimenez e ka falënderuar presidenten Vjosa Osmani pas kërkesës që ajo i bëri sot qeverisë së Kosovës për pezullimin e tarifave të importit ndaj mallrave amerikane.
Ai nëpërmjet një postimi në rrjetin “X” ka thënë se ky shembull duhet të ndiqet edhe nga shtetet e tjera evropiane.
“Faleminderit, Zonja Presidente! Ky veprim po pritet mirë në Shtetet e Bashkuara dhe aleatët tanë të tjerë në Evropë duhet të ndjekin shembullin tuaj.”, ka shkruar ai.
Por, kjo kërkesë e Osmanit u kritikua nga ministri në detyrë i financave, Hekuran Murati.
Ministri i Financave, Hekuran Murati, i ka reaguar ashpër presidentes Vjosa Osmani e cila kërkoi nga Qeveria në detyrë që të pezullojë taksën prej 10% që Kosova e ka të vendosur ndaj mallrave të SHBA-së. Fillimisht Murati vlerëson se temat si kjo trajtohen larg mediave dhe “publiku njoftohet kur të merret vendimi”.
Lidhur me tarifën e SHBA-së, Murati thotë se ka qenë në diskutim me kryeministrin Kurti ditën e djeshme.
“Shfrytëzoj rastin përmes këtij postimi që të njoftoj Presidenten, por edhe qytetarët, që si kabinet qeveritar ne veçse kemi qenë duke e shqyrtuar këtë temë. Dhe kurdo që merret një vendim patjetër që do t’ju njoftojmë me kohë”, komunikon Murati përmes Facebook-ut me presidenten.
Sipas tij, “impakti financiar i pasjes apo jo të një regjimi tarifor ka ndikim të vogël në ekonominë tonë”.
“Gjithsesi, si partnerë e aleatë të përhershëm, synimi ynë është që të rritet vëllimi i këmbimit tregtar, dhe e mbështesim plotësisht parimin e Presidentit Trump për tregti të lirë e pa barriera dhe fer”, pohon ai.
Pas kësaj, këshilltari për media i Presidentes, Bekim Kupina, ishte i ashpër me Muratin. Ai tha se Ministri Murati është njeriu i fundit që mund të flas për seriozitet.
Tutje, Kupina e përshkroi Muratin si “Një njeri që ende nuk e ka kuptuar që udhëheqja e shtetit është punë 24/7, e jo që përfundon në orën 16:00, një njeri që ende nuk e kupton që sipas Kushtetutës dhe komentarit të Kushtetutës, objektivat e politikës së jashtme i përcakton institucioni i Presidencës, që nuk e kupton që këto gjëra nuk janë thjesht veprime ekonomike, por veprime strategjik.”
Kupina gjithashtu ia kujtoi Muratit se Presidentja udhëheq me politikën e jashtme, dhe se kjo temë është e kontekstit strategjik.
Në listat e publikuara të shteteve që SHBA-ja u ka vënë tarifa, figuron edhe Kosova me 10 për qind tarifa. Gjatë ditës së djeshme edhe Oda Ekonomike Amerikane në Kosovë (OEAK) ka kërkuar nga Qeveria e Kosovës që të tërheqë tarifën doganore prej 10 për qind për mallrat nga Shtetet e Bashkuara të Amerikës. /Reporteri.net/
