Ndërsa shumë studentë në mbarë botën përballen me vite të tëra duke paguar kreditë e shtrenjta studentore, të rinjtë në Danimarkë gëzojnë një realitet krejtësisht të ndryshëm. Arsimi atje është falas, dhe shteti madje i paguan studentët ndërsa studiojnë. Studentët mund të fitojnë deri në 1,000 dollarë në muaj, duke u lejuar atyre të studiojnë për një periudhë më të gjatë kohore pa presion financiar.
Danimarka është një nga vendet e pakta në botë ku arsimi i lartë është plotësisht falas, së bashku me Norvegjinë, Finlandën dhe Skocinë. Ajo që e dallon Danimarkën është mbështetja e fortë që u ofron studentëve, veçanërisht atyre që studiojnë me kohë të plotë dhe që kanë nevojë për ndihmë financiare.
Megjithatë, ekziston shqetësim midis disa danezëve, veçanërisht brezit të vjetër, se siguria e tepërt financiare mund t’i bëjë të rinjtë të vonojnë hyrjen e tyre në tregun e punës. Termi “evighedsstuderende” – ose “studentë të përjetshëm” – po përdoret gjithnjë e më shumë për ata që qëndrojnë në universitet pas gjashtë ose më shumë vitesh.
Edhe pse sistemi arsimor në Danimarkë ofron përparësi të shumta, ai financohet i gjithi përmes disa prej taksave më të larta në botë – danezët më të pasur paguajnë deri në 55.9 përqind të të ardhurave të tyre. Por, pavarësisht taksave të larta, Danimarka kryeson rregullisht Raportin Botëror të Lumturisë. Së bashku me Finlandën, të dy vendet alternohen vazhdimisht midis dy vendeve të para në renditje sipas gjashtë kritereve: të ardhurat, jetëgjatësia e shëndetshme, mbështetja sociale, liria, besimi dhe bujaria. (Finlanda ofron gjithashtu arsim të lartë falas.)
Në fund të fundit, shumë danezë i konsiderojnë taksat e larta një kompromis të drejtë për një sistem shoqëror të qëndrueshëm dhe të drejtë. Arsimi falas do të thotë që çdo i ri, pavarësisht nga prejardhja socio-ekonomike, ka një shans të vërtetë për të ndjekur qëllimet e tij.
– Të gjithë kemi mundësinë të studiojmë këtu. «Mendoj se është shumë e rëndësishme që të gjithë të kemi të drejta të barabarta», thotë një student nga Danimarka.
