SpaceX ka vendosur të fluturojë edhe një herë me raketën e saj gjigante Starship, pasi rregullatorët federalë kanë miratuar planet e kompanisë për një fluturim të tretë.
Bëhet e ditur se nisja mund të realizohet në çdo kohë, dhe një transmetim i drejtpërdrejtë i ngjarjes do të fillojë në faqen e internetit të kompanisë rreth 30 minuta para nisjes.
‘Drita e gjelbërt’ i erdhi kompanisë nga Administrata Federale e Aviacionit (FAA) e cila licencon lëshimet e raketave, shkruan yahoonews.
“FAA ka vendosur që SpaceX ka përmbushur kërkesat e sigurisë, mjedisit, politikave, dhe përgjegjësisë financiare”, tha agjencia në një deklaratë.
Ky fluturim provë vjen pas dy përpjekjeve të tjera të cilat përfunduan me shpërthime të anijes kozmike dhe të përforcuesit.
Por, sipas SpaceX, këto dështime e ndihmojnë kompaninë të zbatojë me shpejtësi ndryshime të cilat dërgojnë në rezultate më të mira.
CEO i SpaceX, Elon Musk, e ka cilësuar raketën si mjet thelbësor në misionin themelues të kompanisë: vendosjen e njerëzve në Mars për herë të parë.
Gjithashtu, anija kozmike Starship është mjeti që NASA ka zgjedhur për të ulur astronautët e SHBA-së në Hënë si pjesë e programit të saj Artemis pas më shumë se pesë dekadave.
Zbarkimi i parë i astronautit nën programin Artemis është planifikuar të ndodhë në shtator të vitit 2026.
Ndryshe, agjencia amerikane e hapësirës është zotuar të investojë deri në 4 miliardë dollarë (mbi 3 miliardë euro) në Starship.
