Zëdhënësi i Departamentit të Shtetit të SHBA-së, Matthew Miller deklaroi se ata shpresojnë që në “javët e ardhshme” mund të arrihet armëpushim dhe marrëveshje për shkëmbimin e pengjeve në Gaza dhe se përpjekjet po vazhdojnë për të zgjidhur mosmarrëveshjet mes palëve, transmeton Anadolu.
Në konferencën për media, Miller u tha gazetarëve se ishin të zhgënjyer me ndërprerjet e hasura në negociatat për një proces të mundshëm armëpushimi në Gaza.
“Duhet të arrihet urgjentisht marrëveshje armëpushimi dhe për shkëmbimin e pengjeve në Gaza. Ne mendojmë se jemi në pikën ku mund të arrijmë marrëveshje. Diferencat midis palëve janë ulur ndjeshëm dhe ne besojmë se të gjitha dallimet e mbetura janë të kapërcyeshme”, tha Miller.
Ai vuri në dukje se duke patur parasysh përpjekjet e vazhdueshme, ata shpresojnë se “në javët e ardhshme” mund të arrihet marrëveshje.
Pasi rikujtoi se proceset e mëparshme të negociatave janë bllokuar pavarësisht se dukej se ishin afër përfundimit, Miller tha se “Ne kemi arritur në këtë fazë më parë, por nuk kemi mundur të shohim që palët të arrinin marrëveshje”.
Përpjekjet për armëpushim të udhëhequra nga SHBA-ja, Egjipti dhe Katari deri më tani kanë dështuar për shkak të refuzimit të kryeministrit izraelit Benjamin Netanyahu për të ndaluar sulmet në Gaza.
