Autoritetet në Serbi kanë thënë se janë duke e kërkuar intensivisht Faton Hajrizin, si të dyshuar për vrasjen e një polici serb atje të enjten dhe plagosjen e një tjetri.
“U bëjmë thirrje qytetarëve që ta njoftojnë policinë menjëherë nëse e shohin personin ose kanë informacione për lëvizjet e tij”, ka thënë Ministria e Punëve të Brendshme.
Ministria të premten e ka vënë si të dyshuar kryesor Faton Hajrizin, e jo vëllain e tij Artanin – i cili fillimisht u dyshua për vrasjen pasi dokumentet e tij u gjetën në vendngjarje. MPB-ja serbe kishte pohuar se autor mund të ishte edhe Faton Hajrizi pavarësisht dokumenteve të gjetura, por çështjen rreth kësaj e kishte lënë të hapur deri tash.
Deri më tani janë arrestuar tre persona: Në Serbi i janë vënë prangat ngasësit të taksisë në të cilën ndodhej i dyshuari për vrasjen, e në Republikën Serbe të Bosnjës, ku dyshohet se është arratisur Hajrizi, dy të tjerëve që dyshohet se e kanë aranzhuar udhëtimin e tij për në një vend të tretë.
Faton Hajrizi, i cili për të nëntën herë është arratisur nga burgjet në Kosovë, gati gjatë gjithë pasluftës ka qenë në burg. Fillimisht ai është dënuar për vrasjen e një ushtari rus në Skënderaj, e më pas edhe për një numër tentim vrasjesh e grabitjesh të armatosura. Gjatë kohës prej që ndodhet në arrati, ka pasur disa paraqitje publike në rrjete sociale, gjatë të cilave ka akuzuar, por edhe përqeshur qeveritarët e tashëm.
