Sali: Pas largimit të Taravarit, shumica parlamentare do të ketë 80 deputetë

Bekim Sali, deputet nga radhët e VLEN në Dialog te Lajmi është i bindur se pas largimit të Taravarit nga Qeveria, shumica e re parlamentare do të ketë 80 deputetë.
Këtë hipotezë, Sali e mbështet mbi faktin se në të kaluarën ishte krijuar një mit për Ali Ahmetin si person i pazëvendësueshëm, mit i cili në vitin e fundit është thyer dhe është kuptuar se përveç propagandës nuk ka asgjë të vërtetë.
“ Unë, sipas një parashikimi tim të cilën e analizoj me lëvizjet e fundit, besoj se formimi i shumicës së re parlamentare besoj se do ta mbërrij numrin tetëdhjetë. Edhe pse do të thoni je shumë optimist. Unë jam optimist, për arsye se vitin e kaluar ka qenë një pesimizëm i përgjithshëm, sidomos te kampusi shqiptar dhe etnitë tjera se mund të bëhet diçka. Për arsye se ishte krijuar një mit se Ali Ahmeti është i pazëvendësueshëm, vetëm ai mund të na mbroje interesat, vetëm ai mund të bëje politika shqiptare, vetëm BDI-ja i mbron interesat e shqiptarëve, e kështu me radhë. Në këtë vitin e fundit, ne e shohim se përveç propagandës, d.m.th. përveç propagandës që është zhvilluar nga qarqe, individ të caktuar të cilët natyrisht i shërbejnë një kauze e cila njëzet vite ka dështuar në skenën politike. Përveç propagandës, në realitet nuk ka asnjë bazë”, deklaroi midis tjerash Sali.