Maqedonia e Veriut ka shënuar një hap të ri në bashkëpunimin ekonomik ndërkombëtar, duke forcuar partneritetin strategjik me Shtetet e Bashkuara të Amerikës përmes nënshkrimit të një marrëveshjeje të rëndësishme tregtare, bëri të ditur zv/kryeministri i parë Bekim Sali.
Sipas tij, marrëveshja parasheh uljen e tarifave tregtare deri në 15 për qind, ndërsa për disa produkte ato do të reduktohen deri në zero, me qëllim rritjen e eksportit, tërheqjen e investimeve të reja dhe forcimin e zhvillimit ekonomik afatgjatë.
“Maqedonia e Veriut shënon një hap historik në bashkëpunimin ekonomik me SHBA-të”, theksoi ai, duke shtuar se marrëveshja konsolidon marrëdhëniet strategjike mes dy vendeve.
Ai vlerësoi se marrëveshja reflekton angazhimin e qeverisë për politikë ekonomike transparente dhe konkrete, si dhe për qeverisje të përgjegjshme që vendos interesin e qytetarëve dhe biznesit në qendër.
Sali theksoi se partneriteti me SHBA-të konfirmon rëndësinë strategjike të vendit në arenën ndërkombëtare dhe rolin e tij si partner dhe aleat i qëndrueshëm.
Sipas tij, marrëveshja pritet të krijojë mundësi të reja për bizneset vendore, të zgjerojë qasjen në tregun amerikan dhe të kontribuojë në rritjen e standardit të jetesës dhe ndërtimin e një ekonomie të qëndrueshme dhe konkurruese.
Në fund, ai nënvizoi se përmes këtij partneriteti, vendi riafirmon përkushtimin për bashkëpunim ndërkombëtar të bazuar në transparencë dhe respekt të ndërsjellë.
