Pas disa diskutimeve publike mbi përfitimet institucionale të sportistit të njohur Berat Jakupi, zëvendësministrja e Sportit, Safije Sadiki Shaini, ka reaguar me një sqarim të detajuar duke hedhur dritë mbi statusin e përfitimeve që gëzon ky sportist.
Në një reagim zyrtar, Sadiki Shaini thekson se Berat Jakupi nuk është përfitues i një pensioni të përhershëm klasik, siç janë disa sportistë të dekoruar për arritje olimpike apo tituj botërorë. Megjithatë, ajo thekson se Jakupi nuk është lënë pas dore nga institucionet, përkundrazi, është shpërblyer sipas bazës ligjore për suksesin në Kampionatin Botëror Universitar.
“Ai përfiton një kompensim mujor (stipendi) në vlerë bruto sa dy paga mesatare në muaj, që aktualisht përbën shumën prej 82.478 denarësh”, sqaron zëvendësministrja, duke shtuar se kjo shumë do të paguhet për një periudhë katërvjeçare, në përputhje me aktet dhe vendimet ligjore në fuqi.
Ajo shton se institucionet janë të përkushtuara në vlerësimin e drejtë dhe transparent të çdo sportisti, bazuar në dokumentacion dhe jo në perceptime individuale. “Berat Jakupi mbetet një nga emrat më të respektuar të sportit tonë dhe është vlerësuar institucionalisht, ndërsa përkrahja për të do të vazhdojë”, përfundon Sadiki Shaini.
Në fund të deklaratës së saj, ajo publikon edhe dokumentet zyrtare që vërtetojnë përfitimet e Jakupit, duke i dhënë fund spekulimeve mbi këtë çështje.
