Drejtori i Drejtorisë së Librave Amë, Faton Fazliu, ka njoftuar nënshkrimin e marrëveshjes kolektive me sindikatat, një hap që sjell për herë të parë ndërhyrje të drejtpërdrejtë në pagat e të gjithë të punësuarve në këtë institucion.
Sipas Fazliut, që nga marrja e detyrës ai ka synuar të lë një ndikim konkret përmes veprave, duke vënë theks të veçantë te përmirësimi i kushteve për punonjësit, të cilët i cilëson si shtylla kryesore e funksionimit të institucionit.
Marrëveshja e re parasheh rritje të pagave në tri faza:
- 7% nga marsi 2026
- 7% nga marsi 2027
- 7% nga marsi 2028
Ai theksoi se kjo arritje është rezultat i bashkëpunimit me sindikatat dhe mbështetjes nga Qeveria, duke e konsideruar si një vlerësim të merituar për angazhimin e përditshëm të punonjësve.
“Për dikë mund të jenë vetëm përqindje, por për ne është një hap i rëndësishëm drejt dinjitetit dhe respektit për punën që bëhet çdo ditë”, është shprehur Fazliu.
Me këtë marrëveshje, Drejtoria e Librave Amë synon të përmirësojë jo vetëm mirëqenien e stafit, por edhe cilësinë e shërbimeve për qytetarët.
