Qindra qytetarë i janë përgjigjur thirrjes së grupit “Asnjë cent më shumë” për të protestuar kundër shtrenjtimit të rrymës. Ata thonë se aktualisht çmimet e faturave të energjisë elektrike janë të papërballueshme.
Ata kërkuan të pezullohet propozimi i Zyrës së Rregullatorit për Energji (ZRrE) që tarifa e energjisë elektrike të rritet 15 për qind dhe nëse kjo nuk bëhet, ata paralajmëruan protesta të tjera edhe më masive.
Protestuesit u nisën nga sheshi “Skënderbeu” me pankarta “Nuk paguajmë për dështimet tuaja”, “Fatura jonë, pasuria juaj”, “Ndal varfërimit të qytetarëve”, “Stop vjedhjes me tarifa”, “Qytetarët nuk janë bankomat”, “Rrymë për jetë, jo për profit”.
Duke brohoritur “Asnjë cent më shumë” protestuesit u nisën drejt objektit të Ministrisë së Ekonomisë, ku edhe i vendosën pankartat.
Aktivisti i grupit “Asnjë cent më shumë”, Besnik Shabiu tha se qytetarët e Kosovës nuk e meritojnë nga asnjë institucion dhe qeveri tu vështirësohet jeta me ngritjen e çmimeve, siç është ai i rrymës. Madje, sipas tij në vendin tonë po vjen edhe një valë e re e ngritjes së çmimeve të produkteve ushqimore.
Shabiu tha se kërkesa e protestuesve është e qartë për t’u pezulluar propozimi i ZRrE-së që energjia elektrike të rritet 15 për qind. Ai kërkoi nga ZRrE-ja dhe Ministria e Ekonomisë të rihapin diskutim të gjerë dhe të bashkëpunohet për një plan afatgjatë që Kosova t’i shpëtojë problemit energjetik.
“Kërkesa e grupit ka qenë prej fillimit e qartë, dhe kësaj kërkese ju kanë bashkuar masivisht qytetarët e kësaj republike sepse “Asnjë cent më shumë”, nuk e meritojnë qytetarët e Republikës së Kosovës, që të paguajnë taksa tjera. Përveç shtrenjtimit të rrymës ne jemi dëshmitarë që tani është lajmëruar edhe një valë e re e rritjes së çmimeve të produkteve ushqimore dhe produkteve të ushqimit…Populli i cili është i zhytur në kredi dhe borxhe nuk e meriton absolutisht nga asnjë institucion, nga asnjë qeveri që të i vështirësohet jeta. Kërkesa jonë ndaj ZRrE-së dhe Ministrisë së Ekonomisë është shumë konkrete dhe e çartë: të pezullohet vendimi i shtrenjtimit për 15% siç është paralajmëruar i energjisë elektrike, të rihapet një diskutim i gjerë, në të cilin edhe ne do të bashkëpunojmë, edhe ekspertët e grupit që janë bashkuar, vullnetarisht do të bashkëpunojmë. Të bëhet një plan i qartë afatgjatë, një strategji që do ta nxjerrë Kosovën njëherë e përgjithmonë prej problemit energjetik”, tha Shabiu.
Ndërkaq qytetari Ali Sefaj kërkoi nga protestuesit që t’i lënë para objektit të Ministrisë së Ekonomisë pankartat, derisa në hyrje të objektit qëndruan disa pjesëtarë të Policisë së Kosovës.
“Zonja ministre, jo që nuk ka pasur gatishmëri t’i dëgjoj kërkesat tona, mirëpo ajo fatkeqësisht ka përdorur fjalë që nuk do të duhej për qytetarët dhe për ata që nuk pajtohen me këtë propozim për shtrenjtim. Te Ministria e Ekonomisë do t’i lëmë të gjitha parullat, komentet, adresimet që i kemi pasur, e ata kur të kthehen ditën e hënë t’i marrin parasysh kërkesat tona, protestat tona do të masivizohen derisa ata t’i përfillin ato ‘Asnjë cent më shumë, Asnjë cent më shumë, Asnjë cent më shumë’, tha Sefaj.
Aktivisti tjetër i grupit “Asnjë cent më shumë”, Dibran Hoxha para objektit të ME-së, tha se KEDS-i çdo vit po abuzon me ngritjen e çmimeve, e që sipas tij në kurriz të qytetarëve kjo barrë po rëndon çdo ditë e më shumë.
“KEDS-it iu ka tharë fyti prapë edhe për me ia lag fytin KEDS-it, janë mobilizuar Ministria e Ekonomisë, ZRrE, Presidenca, edhe qeveria, por ne nuk do ta lejojmë këtë. Çdo cent që jepet për faturën e energjisë, është goditje për punëtorin e pastrimit, për mësuesin, për infermieri, punëtorin e supermarketit, punëtorin e KEK-ut ndërsa në kurrizin e krejt këtyre fiton veç KEDS-i. KEDS-i vit pas viti po abuzon me ngritjen e çmimeve, e në kurriz të qytetarëve kjo barrë po rëndon çdo ditë e më shumë. Krejt po na mashtrojnë po rrugë tjetër këtu nuk ka, veç nacionalizimi, ku është kontrata e KEDS-it, ku janë investimet, ku janë furnizimet 24 orë me rrymë”, tha Hoxha.
Ndër protestuesit ishte edhe qytetari Maliq Maliqi. Ai ankohet se çdo muaj fatura e energjisë elektrike po i vjen gjithnjë më e lartë. Por, ai ka edhe një vërejtje për qytetarët.
“Në televizion diku i dëgjuar lajmet e kemi marrë vesh për protestë dhe e kam parë të arsyeshme të dalë. Na mbytën. Një muaj më ka ardhur 60 euro, i dyti muaj 75 euro, ky i treti 85 euro. Investime s’ka asgjë. Rryma për ditë shtrenjtohet. Nuk e di si mund t’i dalim ballë populli këtë krizë që është bërë…Papunësi, varfëri, faqe e zezë…Më të vërtetë është shumë shtrenjtë. Është popull interesant, kur t’i dëgjosh nëpër oda, sallone, kafe, thonë se të gjithë do të dalim (për të protestuar), pasi rryma është e shtrenjtë. Të gjithë thonë se do të dalim sa janë duke pirë çaj, si ta kryejnë punën nuk dëgjon kush që është shtrenjtë”, tha Maliqi.
Në anën tjetër, protestuesi Bajram Uka ka kujtuar fjalët e kryeministrit në detyrë Albin Kurti para disa viteve kur kishte thënë se “flemë në qymyr”, derisa tash vjen propozimi për ngritje të çmimit të energjisë elektrike.
“Kemi dalë në protestë normal se jemi të pakënaqur. Rryma për katër vjet është ngritur gati 120 për qind. Duke dëgjuar që neve njerëzve që janë në pensione si mund të ekzistojnë këto çmime të pa matura dhe shumë të larta…Ishim me familjen në protestë, por ata u shpërndanë. Është e tmerrshme. Thoshte kryeministri më parë ‘Ne flemë në qymyr dhe në energji’ e tash rrite trefish rrymën, kjo është e patolerueshme. Po shihet se ka hyrë në funksion mafia energjetike”, u shpreh Uka.
Paralajmërimi për rritjen e çmimit të rrymës ka ngjallur reagime të mëdha dhe pakënaqësi te qytetarët dhe bizneset. Kundër shtrenjtimit të energjisë elektrike ka pasur protesta edhe në të kaluarën. Gjatë një aksioni simbolik të grupit Asnjë cent me shumë te zyrat e ZRRE-së ishin arrestuar 12 aktivistë. ZRRE-ja pritet të merr vendimin për çmimin e energjisë elektrike më 11 prill.
