Prokurorët amerikanë do të kërkojnë dënimin me vdekje për Luigi Mangione, njeriun e akuzuar për vrasjen e shefit ezekutiv të “UnitedHealthcare”, Brian Thompson në dhjetor.
Prokurorja e Përgjithshme, Pam Bondi, ka thënë në një deklaratë të martën se ajo kishte urdhëruar prokurorët federalë të kërkonin dënimin për “vrasjen të paramenduar, me gjakftohtësi”.
Thompson është qëlluar për vdekje jashtë një hoteli në Nju Jork më 4 dhjetor. Policia amerikane ka arrestuar Mangione, 26, javë më vonë në Pensilvani pas një kërkimi mbarëkombëtar, raporton BBC.
Ai është deklaruar i pafajshëm për akuzat shtetërore dhe ende nuk është deklaruar për akuza të veçanta federale. Ai aktualisht është në pritje të gjykimit në një burg federal të Nju Jorkut.
Në deklaratën për shtyp, Bondi ka thënë se vrasja e Thompsonit “ishte një akt dhune politike” dhe se “mund të ketë paraqitur rrezik të madh për vdekje për persona të tjerë” aty pranë.
Hetuesit thonë se Mangione ishte i motivuar të vriste Thompson, 50 vjeç, për shkak të zemërimit me kompanitë amerikane të sigurimit shëndetësor.
Mangione po përballet me 11 akuza penale shtetërore në Nju Jork, duke përfshirë vrasjen e shkallës së parë dhe vrasjen si krim terrorizmi.
Nëse shpallet fajtor për të gjitha akuzat, ai do të përballet me një dënim të detyrueshëm me burgim të përjetshëm pa mundësinë e lirimit me kusht.
