Avokati Antonio Apostolski do të përfaqësojë ish-drejtorin e Lotarisë Shtetërore, Përparim Bajrami në rastin për të cilin ai së bashku me ish-zëvendëskryeministrin Artan Grubi dhe disa të tjerë dyshohet se kanë përvetësuar rreth tetë milionë euro në Lotari.
Informacionin për MPB-në e ka konfirmuar vetë Apostolski, i cili ka thënë se Bajrami nuk ka ikur nga vendi, por ka disa muaj që jeton jashtë vendit.
Ndërsa kryeministri Hristijan Mickoski duke folur për këtë rast në emisionin “Click Plus” tha se drejtori i Lotarisë Shtetërore ka kohë që nuk është në vend.
“Informacioni im është se ish-drejtori i Lotarisë Shtetërore ka mjaft kohë që ndodhet jashtë vendit. Ndërkaq, ish-zëvendëskryeministri dje është larguar nga Maqedonia me një biznesmen me veturë me targa diplomatike dhe është nisur drejt fqinjit tonë verior, Kosovës”, tha Mickoski.
Ministria e Punëve të Brendshme ka lëshuar fletarrest ndërkombëtar për Grubin dhe Bajramin pasi Gjykata Themelore Penale në Shkup u ka shqiptuar atyre 30 ditë paraburgim.
