Ish-këshilltari i lartë, Eset Berisha dhe ish-ministri i Infrastrukturës, Pal Lekaj
“Për me përkthy se ministri nuk e ka ditë gjuhën angleze”, ish-këshilltari i Pal Lekajt e pranon se mori pjesë në takimet me ‘Bechtel & Enka”
Eset Berisha, i akuzuar nga Prokuroria Speciale në rastin e 53-milionëshit e ka pranuar se ka marrë pjesë në takimet me kompaninë ndërtuese ‘Bechtel & Enka”. Ai tha se ka marrë pjesë në bisedime vetëm si përkthyes. “Për me përkthy për shkak që ministri nuk e ka ditë gjuhën angleze. S’ka pas përkthyes” – tha Berisha Berisha i ftuar në KallxoPernime nuk e mohoi të ketë marrë pjesë në takime me kompaninë ndërtuese. Sipas tij, këto takime janë zhvilluar për të biseduar për zhvillimin e projektit dhe për problemet që janë hasur gjatë ndërtimit.“Ne jemi taku me “Bechtelin” në zyre të ministrit Lekaj shumë herë për shkak të zhvillimit të projektit për shkak të problemeve që janë has”- tha tutje Berisha. I njëjti tha se në këto takime ka marrë pjesë vetëm si këshilltar i ministrit. Berisha ishte dënuar me 3 vite e 3 muaj dënim me burgim nga Departamenti Special i Gjykatës së Prishtinës me 31 janar 2024, ndërsa të njëjtit i’u ndalua ushtrimi i funksioni në administratë publike për tre vite dënim i cili do të ekzekutohet pasi të mbahet dënimi me burgim, kur vendimi të merr formën e prerë. Gjykata ka shpallur fajtor dhe ka dënuar ish-ministrin e Infrastrukturës, Pal Lekaj me 3 vjet e 8 muaj burgim dhe me dënim plotësues prej 3 vjet e 6 muaj ndalim i ushtrimit të funksionit në administratë publike. Sekretari i përgjithshëm të Ministrisë së Infrastrukturës për kohën kur ishte ngritur aktakuza, Nebih Shatri dhe drejtorin e prokurimit publik në këtë ministri, Besim Tahiri janë dënuar secili me nga një vit e tetë muaj burg dhe me dënim plotësues prej 2 vitesh ndalim ushtrimit të funksionit në administratë publike. Detaje nga aktakuza e Prokurorisë Speciale për ish- këshilltarin politik Eset Berishën dhe tre të tjerëtProkuroria kishte kërkuar dënim maksimal për të akuzuarit kurse mbrojta lirimin e të pandehurve në seancën kur janë thënë fjalët përfundimtare. Prokuroria Speciale më 4 shkurt të vitit 2022 kishte ngritur aktakuzë ndaj ish-ministrit të Infrastrukturës Pal Lekaj, këshilltarit të tij politik Eset Berisha dhe Sekretarit të përgjithshëm të Ministrisë së Infrastrukturës, Nebih Shatrit dhe Besim Tahirit, lidhur me ekzekutimin e 53 milionë eurove për kompaninë “Bechtel & Enka” e cila ishte kontraktuar për ta ndërtuar autostradën “Arbën Xhaferi” Sipas aktakuzës, Pal Lekaj, Nebih Shatri dhe Besim Tahiri me dashje i kanë tejkaluar kompetencat e tyre dhe nuk i kanë përmbushur detyrat e tyre zyrtare me datë 29 shatator të vitit 2017. Sipas prokurorisë keqpërdorimi ka ndodhur në momentin kur të lartcekurit kanë nënshkruar marrëveshjen për shtyrjen e afatit të përfundimit të punimeve për 347 ditë të tjera, për autostradën “Arbën Xhaferi” apo e njohur si R6.Përfundimi i autostradës me kontratën bazë e cila ishte lidhur në vitin 2014 parashihej të përfundonte me 18 janar të vitit 2018, kurse me marrëveshjen e re të lidhur nga të pandehurit, kontrata tashmë do të përfundonte në fund të muajit dhjetor të vitit 2018. Kjo marrëveshje, sipas prokurorisë, nga të pandehurit ishte lidhur pa kosot financiare që ishte në kundërshtim me ligjin e prokurimit publik dhe me Statutin dhe Kodin e Sjelljes të Komitetit Drejtues Ndërministror. Duke mos përcaktuar koston në marrëveshje, prokuroria thotë që të pandehurit i kanë lënë rrugën hapur kompanisë “Bechtel & Enka” që të paraqesë kërkesë për pagesë.
