Një ditë pas certifikimit të rezultatit të zgjedhjeve, kandidati i PDK-së për kryeministër, Bedri Hamza, ka thënë në një konferencë shtypi se është i gatshëm që ta drejtojë qeverinë, në rast se këtë dështon ta bëjë Lëvizja Vetëvendosje, si fituese e zgjedhjeve të 9 shkurtit. Ai ka konfirmuar bisedimet e realizuara me përfaqësues të LDK-së, AAK-së dhe Nismës, porse ka theksuar se deri tash temë nuk ka qenë se kush duhet të jetë kryeministri. Megjithëkëtë, ai ka insistuar se verdikti qytetar ka treguar se cilës parti i përket ky post
Kandidati për kryeministër i Partisë Demokratike (PDK), Bedri Hamza, i ka bërë të ditur të premten diskutimet për formimin e qeverisë së re, të cilat i ka nisur me përfaqësues të partive të tjera që për katër vjet kanë qenë në opozitë.
Tek i ka kumtuar në një konferencë shtypi komunikimet me zyrtarë të Lidhjes Demokratike (LDK), Aleancës për Ardhmërinë e Kosovës (AKK) dhe të Nismës Socialdemokrate, Hamza ka thënë se është i gatshëm që ta drejtojë qeverinë, në rast se këtë nuk mund ta bëjë Lëvizja Vetëvendosje (LVV), e cila i ka fituar zgjedhjet parlamentare të 9 shkurtit.
“Besoj se, duke respektuar Kushtetutën, ligjet, partia e parë do të provojë në kohë dhe pa vonesa t’i krijojë institucionet, edhe konstituimin e Kuvendit, edhe qeverinë. Bazuar në situatën gjeopolitike në të cilën ndodhemi, situatën ekonomike në të cilën ndodhet vendi, Kosova ka nevojë për institucione. Në rast se partia e parë nuk arrin brenda afateve ligjore dhe kushtetuese unë jam i gatshëm, si kandidat për kryeministër nga PDK-ja, t’i marrë përgjegjësitë për formimin e qeverisë”, ka thënë ai të premten.
Që nga përfundimi i zgjedhjeve, Lumir Abdixhiku, kryetar i LDK-së që u rendit e treta në zgjedhjet e 9 shkurtit, ka bërë të qartë se nuk bëhet pjesë e asnjë qeverie, pa e pasur pozitën e kryeministrit.
Por Hamza ka theksuar se në diskutime ende nuk është përfshirë çështja e ndarjes së posteve, teksa ka vlerësuar se pozitën e kryeministrit në “qeverinë e opozitës” e kanë caktuar qytetarët.
“Renditja është e qartë. PDK-ja është partia e dytë, i ka 24 deputetë dhe asnjëherë në tavolinë nuk kemi pasur kërkesë, temë, qysh ka për t’u dukur qeveria e ardhshme e Kosovës. Radha dihet dhe mbi bazën e kësaj ne do të diskutojmë”, ka theksuar Hamza.
E për qëndrimin e shprehur nga Abdixhiku lidhur me postin e kryeministrit, Hamza i PDK-së ka thënë se me LDK-në ende nuk është hapur tema e këtij posti.
“Me disa parti politike thuajse jemi në rregull. Mundemi me ardhë te faza dhe pjesa, të flasim edhe për formulën e komponimit të qeverisë. Me disa, sa i përket partive politike, e thash edhe në këtë rast, edhe me LDK-në, ne ende nuk kemi mbërritur në atë fazë, ku ta diskutojmë formulën e krijimit të qeverisë”, ka theksuar Hamza.
Kandidati për kryeministër i PDK-së ka theksuar po ashtu se nuk ka vija të kuqe as për Vetëvendosjen, porse ka shtuar që e preferon bashkëpunimin me partitë opozitare.
E nga LVV-ja ai ka theksuar se nuk ka marrë ftesë për bashkëpunim.
“Me partinë e parë nuk kemi kurrfarë komunikimi zyrtar. Nuk kemi pranuar ftesë, nuk i kemi bërë ftesë sepse ftesa e radha dihet qysh shkon. Për shkak të programeve, për shkak të bindjeve politike, për shkak të koncepteve për mua është i preferueshëm krijimi i qeverisë me LDK-në dhe partitë e tjera që kanë ulëse në Kuvend”, ka thënë Hamza.
Si bartës i listës së PDK-së në zgjedhjet e 9 shkurtit, Bedri Hamza ka marrë 173 mijë e 526 vota nga totali prej 196 mijë e 474 votave sa i ka subjekti. Ndonëse ka siguruar mandat deputeti në Kuvendi, ai ka zgjedhur që ta mbajë detyrën e kryetarit të Komunës së Mitrovicës. Vendimin për këtë, ai ka thënë se e ka marrë për ta shmangur mbajtjen e zgjedhjeve të parakohshme në komunën që e drejton prej vitit 2021.
“Besoj që kish me qenë e padrejtë që brenda një periudhe të shkurtër, ndoshta më pak se gjashtë muaj, komuna me i pas dy palë zgjedhje. Kish me qenë pengesë për zhvillimin e projekteve, por kish me qenë edhe barrë për buxhetin e Republikës”, ka thënë ai të premten.
Komisioni Qendror i Zgjedhjeve (KQZ) e ka certifikuar të enjten rezultatin zgjedhor, sipas të cilit PDK-ja është renditur si subjekti i dytë, pas LVV-së. Për certifikimin e rezultatit, KQZ-së i janë dashur 46 ditë koh]ë që nga mbajtja e zgjedhjeve.
Hamza ka vlerësuar në konferencë se procesi i certifikimit të rezultateve është zgjatur pa nevojë dhe se kjo e ka zbehur suksesin e zgjedhjeve parlamentare.
Sipas rezultateve të certifikuara, LVV-ja ka marrë 42.30 për qind të votave apo 48 mandate në Kuvend. PDK-ja ka marrë 20.95 për qind të vota e 24 ulëse në Parlament, LDK-ja 18.27 për qind të votave dhe 20 ulëse. Si i katërti në zgjedhje ka dalë koalicioni mes AAK-së dhe Nismës, 7.06 për qind të votave të marra apo 8 ulëse. 20 ulëset tjera në Kuvend janë të siguruara për komunitetet joshumicë.
