Gjykata Kushtetuese sot e pranoi letrën nga kryetari i Kuvendit të Republikës së Maqedonisë së Veriut, me të cilin dorëzohet Vendimin i datës 15.05.2025 i Gjykatës Administrative të Republikës së Maqedonisë së Veriut. Gjykata Kushtetuese mbeti pa një gjyqtar pasi Gjykata Administrative anuloi vendimin e Parlamentit për zgjedhjen e Elizabeta Dukovskës si gjyqtare kushtetuese nga dy vjet më parë. Dukovska u propozua si gjyqtare kushtetuese nga Këshilli Gjyqësor, i udhëhequr atëherë nga Vesna Dameva, transmeton Portalb.mk.
“Gjykata Kushtetuese nuk komenton Vendimin e Gjykatës Administrative. Veprimet e të gjitha organeve të përfshira, siç janë Këshilli Gjyqësor, Kuvendi dhe gjykatat administrative në këtë rast, kanë shkaktuar një precedent ligjor që ka krijuar një situatë ligjore me të cilën nuk është përballur asnjë përbërje e mëparshme e Gjykatës Kushtetuese. Një precedent i tillë ligjor padyshim krijon implikime ligjore në veprimet e Gjykatës Kushtetuese në përputhje me kompetencat e saj”, thonë nga Gjykata Kushtetuese.
Në takimin e sotëm të punës, për shkak të interesit të madh publik për çështjet prioritare, Gjykata njoftoi se ka vendosur:
Të shtyjë seancën përgatitore për çështjen mbi Ligjin për Përdorimin e Gjuhëve, e cila ishte caktuar për 19 qershor 2025, për shkak të faktit se gjyqtarja e cila i referohet vendimi i anuluar për përzgjedhje me vendimin e Gjykatës Administrative është gjyqtare raportuese e lëndës konkrete, ndërsa përveç kësaj Gjykata ka miratuar një Përfundim sipas të cilit procedurat për këtë çështje duhet të jenë në përbërje të plotë të Gjykatës.
Lidhur me implikimet ligjore të Vendimit të Gjykatës Administrative, theksojmë se në përputhje me nenin 112 paragrafi 2 të Kushtetutës, vendimet e Gjykatës Kushtetuese janë përfundimtare dhe të zbatueshme, Gjykata Kushtetuese nuk do të shqyrtojë sipas detyrës zyrtare vendimet në marrjen e të cilave ka marrë pjesë gjyqtarja së cilës i referohet vendimi i anuluar për përzgjedhje me vendimin e Gjykatës Administrative.
Kujtojmë se padi u ngrit në Gjykatën Administrative në vitin 2023 nga Antoneta Dimovska, e cila tani është anëtare e Këshillit Gjyqësor, dhe më pas si gjyqtare ajo ishte midis tre kandidatëve për gjyqtare kushtetuese të propozuar nga anëtarët e Këshillit Gjyqësor.
Fillimisht u votua për Dukovskën, e cila mori 11 vota “pro” dhe 2 “kundër”, ndërsa Dimovska dhe gjyqtarja Tatjana Susuleska nuk u vunë fare në votim. Dukovska iu dërgua si propozim Kuvendit, i cili e zgjodhi atë me 64 vota “pro”.
Paraprakisht, Gjykata Administrative dy herë e hodhi poshtë padinë për shkak të vonesës dhe arsyeve të tjera, ndërsa Gjykata e Lartë Administrative dy herë i rrëzoi vendimet e Gjykatës Administrative, dhe herën e tretë Gjykata Administrative lëshoi vendim anulues.
Ministri i Drejtësisë, Igor Filkov, është i mendimit se Këshilli Gjyqësor duhet ta përsërisë procedurën dhe t’i propozojë Kuvendit një kandidat për gjyqtar kushtetues.
Kujtojmë se seanca përgatitore për Ligjin për Gjuhët është planifikuar për 19 qershor 2025. Kryetari i Gjykatës Kushtetuese shpjegoi se për shkak të tragjedisë në Koçan, Gjykata e shtyu seancën një herë, dhe vlerësimet e tij janë se pas zgjedhjeve lokale në vjeshtë, do të ketë vendim nga Gjykata.
